កីឡាករ កីឡាការិនីថ្នាលវ័យក្មេងនៃកីឡាតេក្វាន់ដូ WT ចំនួន១២៨ រូប មកពី ១៥ ក្លិបបានចូលរួមការប្រកួតពានរង្វាន់ អគ្គកុងស៊ុល សាធារណរដ្ឋកូរ៉េ នៅខេត្តសៀមរាប ថ្ងៃទី៦ ខែមិថុនា ឆ្នាំ ២០២៦ នេះ។
លោក យីវ វណ្ណឌី គណៈកម្មការរៀបចំការប្រកួតថ្លែងថា ព្រឹត្តិការណ៍នេះប្រព្រឹត្តទៅរៀងរាល់ឆ្នាំ ហើយឆ្នាំនេះ គឺផ្ដោតសំខាន់ដើម្បីចម្រាញ់យកធនធានវ័យក្មេងល្អៗ យកទៅដុសខាត់សមត្ថភាព និងក្រសោបឱកាសជាថ្នាលជម្រើសជាតិតេក្វាន់ដូ WT កម្ពុជា ដើម្បីត្រៀមព្រឹត្តិការណ៍ កីឡាយុវជនអាស៊ី ឆ្នាំ ២០៣១ នៅកម្ពុជា។
សម្រាប់ប្រភេទអាយុ គឺមានចន្លោះពីអាយុក្រោម ៩ ឆ្នាំ ១០ និង ១១ឆ្នាំ និង ១២ ដល់ ១៤ ឆ្នាំ ប្រកួតលើវិញ្ញាសាមេគុន និងប្រយុទ្ធ។
ចំពោះបេក្ខភាពដែលមានសមត្ថភាពល្អៗ នឹងទទួលបានឱកាសចូលជំរំហ្វឹកហាត់ ដែលធ្វើឡើងមួយឆ្នាំម្ដង បូកនឹងកម្មវិធីមួយចំនួនទៀត ដើម្បីកសាងគុណផលឱ្យបានល្អ ឆ្ពោះទៅជាធនធានថ្នាលជម្រើសជាតិ។
ក្នុងកម្មវិធីប្រកួតដ៏សំខាន់នេះ ក៏មានវត្តមានលោក KIM Sungtae ប្រធានកុងស៊ុល សាធារណរដ្ឋកូរ៉េ ប្រចាំខេត្តសៀមរាប ចូលរួមផងដែរ៕
