ការប្រកួតកីឡាការ៉ាតេប្រចាំព្រឹត្តិការណ៍កីឡាឧត្ដមសិក្សា និងមធ្យមសិក្សាបច្ចេកទេសថ្នាក់ជាតិ ឆ្នាំ២០២៦ បានបើកដំណើរការហើយនៅព្រឹកថ្ងៃសុក្រ ទី១២ ខែមិថុនា ឆ្នាំ២០២៦ នាមជ្ឈមណ្ឌលជាតិហ្វឹកហ្វឺនកីឡាការ៉ាតេ សាកលវិទ្យាល័យភូមិន្ទភ្នំពេញ ក្រោមអធិបតីភាពឯកឧត្ដម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា អគ្គលេខាធិការគណៈកម្មាធិការជាតិអូឡាំពិកកម្ពុជា និងជាអគ្គលេខាធិការសហព័ន្ធកីឡាការ៉ាតេកម្ពុជា តំណាងដ៏ឯកឧត្ដមអគ្គបណ្ឌិតសភាចារ្យ អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និង ហិរញ្ញវត្ថុ និងជាប្រធានសហព័ន្ធ។
សម្រាប់ក្រុមចូលរួមមានចំនួន៦មានដូចជា សាកលវិទ្យាល័យសេដ្ឋកិច្ច និងហិរញ្ញវត្ថុ សាកលវិទ្យាល័យ វេស្ទើន សាកលលវិទ្យាល័យ ឡាយហ្វ សាកលវិទ្យាល័យ CamTech វិទ្យាស្ថាន CamED និង សាកលវិទ្យាល័យ អាមេរិកាំងភ្នំពេញ។ ក្នុងនោះ កីឡាករមានចំនួន១៣រូប និងកីឡាការិនី១០នាក់។
ចំណែកវិញ្ញាសាសម្រាប់ការប្រកួតមានចំនួន២ គឺ កាតា (Kata) និង ប្រយុទ្ធ (Kumite)។ សម្រាប់វិញ្ញាសាកាតា មានឯកត្តជន បុរស និង ឯកត្តជន នារី។ វិញ្ញាសាប្រយុទ្ធឯកត្តជនបុរសមានប្រភេទទម្ងន់-៥៥គីឡូក្រាម និង +៥៥គីឡូក្រាម។ ដោយឡែក វិញ្ញាសាឯកត្តជននារី មានប្រភេទទម្ងន់-៥០គីឡូក្រាម និង នារីទម្ងន់+៥០គីឡូក្រាម។
វគ្គផ្ដាច់ព្រ័ត្រនឹងប្រព្រឹត្តទៅនៅព្រឹកថ្ងៃសៅរ៍ ទី១៣ ខែមិថុនា នាមជ្ឈមណ្ឌលជាតិហ្វឹកហ្វឺនកីឡាការ៉ាតេ សាកលវិទ្យាល័យភូមិន្ទភ្នំពេញ៕
