ភ្នំពេញ៖ អង្គការសាមគ្គីអូឡាំពិក (Olympic Solidarity - OS) នៃគណៈកម្មាធិការអូឡាំពិកអន្តរជាតិ (IOC) បានសម្តែងការកោតសរសើរ និងវាយតម្លៃខ្ពស់ចំពោះសមិទ្ធផលការងារលេចធ្លោជាច្រើន ព្រមទាំងការពង្រឹងអភិបាលកិច្ចរបស់គណៈកម្មាធិការជាតិអូឡាំពិកកម្ពុជា (NOCC) ក្នុងការជំរុញ និងអភិវឌ្ឍចលនាអូឡាំពិកនៅកម្ពុជា។
ការកោតសរសើរនេះ ត្រូវបានបញ្ជាក់ដោយលោក ជា លីម៉ីញ អនុប្រធាននាយកដ្ឋានទំនាក់ទំនងអន្តរជាតិ នៃ NOCC ដែលកំពុងចូលរួមកម្មសិក្សាការងារជាមួយមន្ត្រីអង្គការសាមគ្គីអូឡាំពិក នៅទីស្នាក់ការកណ្តាលរបស់គណៈកម្មាធិការអូឡាំពិកអន្តរជាតិ (IOC) ក្នុងទីក្រុង Lausanne ប្រទេសស្វីស។
លោក ជា លីម៉ីញ បានឱ្យដឹងថា មន្ត្រីជាន់ខ្ពស់របស់ OS បានវាយតម្លៃខ្ពស់ចំពោះការងាររបស់ NOCC ជាពិសេសលើការពង្រឹងអភិបាលកិច្ច ការលើកកម្ពស់តម្លៃអូឡាំពិក និងការអភិវឌ្ឍចលនាអូឡាំពិកនៅកម្ពុជា ដែលបានអនុវត្តប្រកបដោយប្រសិទ្ធភាព និងស្របតាមទិសដៅរបស់ IOC។
ជាមួយគ្នានេះ មន្ត្រី OS ក៏បានកោតសរសើរចំពោះថ្នាក់ដឹកនាំ និងមន្ត្រីជាន់ខ្ពស់ NOCC ដែលបានអនុវត្តការងារ និងកិច្ចសហប្រតិបត្តិការជាមួយ OS ប្រកបដោយវិជ្ជាជីវៈ សមត្ថភាពខ្ពស់ និងការទទួលខុសត្រូវ ក្នុងការអភិវឌ្ឍវិស័យកីឡា និងចលនាអូឡាំពិកនៅកម្ពុជា។
បន្ថែមពីនេះ OS បានបង្ហាញការប្តេជ្ញាចិត្តបន្តគាំទ្រ NOCC តាមរយៈកម្មវិធី និងសកម្មភាពផ្សេងៗ ដើម្បីជួយជំរុញការផ្សព្វផ្សាយគុណតម្លៃអូឡាំពិក និងការអភិវឌ្ឍវិស័យកីឡានៅកម្ពុជាឱ្យកាន់តែរីកចម្រើន។
សូមបញ្ជាក់ថា NOCC បានចាត់បញ្ជូនលោក ជា លីម៉ីញ ទៅចូលរួមកម្មវិធី IOC Immersion Stay Programme នៅទីស្នាក់ការកណ្តាល IOC ក្នុងទីក្រុង Lausanne ប្រទេសស្វីស ចាប់ពីថ្ងៃទី១ ដល់ថ្ងៃទី១២ ខែឧសភា ឆ្នាំ២០២៦។
កម្មវិធីនេះមានគោលបំណងពង្រឹងកិច្ចសហប្រតិបត្តិការជាមួយ IOC ពង្រីកបណ្តាញទំនាក់ទំនងអន្តរជាតិ និងលើកកម្ពស់សមត្ថភាពការងាររបស់មន្ត្រីជាន់ខ្ពស់ NOCC ឱ្យស្របតាមគោលការណ៍ណែនាំរបស់ IOC និងធម្មនុញ្ញអូឡាំពិក។
ការចូលរួមក្នុងកម្មវិធីនេះ ត្រូវបានចាត់ទុកថាជាឱកាសដ៏មានតម្លៃសម្រាប់មន្ត្រី NOCC ក្នុងការសិក្សាបទពិសោធន៍ថ្មីៗ ផ្លាស់ប្តូរចំណេះដឹង និងពង្រឹងសមត្ថភាពការងារ ដើម្បីរួមចំណែកអភិវឌ្ឍចលនាអូឡាំពិក និងវិស័យកីឡាកម្ពុជាឱ្យកាន់តែមានភាពរឹងមាំ និងឈានទៅមុខជាបន្តបន្ទាប់៕
