ជំដ៏ជក់ចិត្តនឹងកើតឡើងនៅលើសង្វៀន Dragon the Golden Ring ចុងសប្តាហ៍នេះ ខណៈម្ចាស់មេដាយមាសប្រដាល់សកលស៊ីហ្គេម ឆ្នាំ២០២៣ កម្ពុជា Rajapov Abdullah ត្រៀមបង្ហាញខ្លួនជាលើកដំបូងក្នុងកម្មវិធីដ៏ធំមួយនេះ។
Rajapov នឹងត្រូវឡើងសង្វៀនបំបែកភាពស្ងប់ស្ងាត់នៅថ្ងៃសុក្រ ទី២៦ ខែមិថុនា ឆ្នាំ២០២៦ ខាងមុខនេះ នាសាលកីឡាប្រដាល់សកលកម្ពុជានៃពហុកីឡដ្ឋានជាតិអូឡាំពិក។ វីរបុរសមេដាយមាសស៊ីហ្គេមរបស់កម្ពុជាត្រូវប្រឈមមុខ កីឡាករលេចធ្លោជនជាតិអង់ហ្គេឡា Sapalo ។ តាមពិតទៅ Sapalo មិនមែនជាអ្នកថ្មីលើសង្វៀន Dragon the Golden Ring នោះទេ ពោលគឺរូបគេធ្លាប់ចាញ់ក្រោមដៃកីឡាករជម្រើសជាតិកម្ពុជា Anvar Nasredinov ម្តងរួចមកហើយ កាលពីខែឧសភា។
ការប្រកួតលើកនេះក៏ជាការសាកល្បងសមត្ថភាពដ៏សំខាន់មួយសម្រាប់ Rajapov ក្នុងការរក្សាភាពខ្លាំង និងដណ្តើមជ័យជម្នះជូនអ្នកគាំទ្រក្នុងស្រុក ខណៈ Sapalo ប្រាកដជាមកជាមួយមហិច្ឆតាចង់ស្តារមុខមាត់ឡើងវិញដូចគ្នា។
Rajapov និយាយថា បានត្រៀមខ្លួនរួចជាស្រេចសម្រាប់ការប្រកួតជាលើកដំបូងក្នុងកម្មវិធី Dragon the Golden ព្រោះជាការប្រកួតដ៏សំខាន់មួយដើម្បីត្រៀមលក្ខណៈចូលរួមព្រឹត្តិការណ៍អន្តរជាតិនានានៅក្រៅប្រទេសនាពេលខាងមុខ៕
