ទោះបីទទួលបានលទ្ធផលមិនគាប់ប្រសើរពីការប្រកួតកីឡាជឺជីតស៊ូជើងឯកអាស៊ីនៅក្រុងអាល់ម៉ាទី ប្រទេសកាហ្សាក់ស្ថាន នាពេលថ្មីៗនេះ ឯកឧត្ដម ថោង បញ្ញាធន ប្រធានសហព័ន្ធកីឡាជឺជីតស៊ូ នៅតែបង្ហាញសុទិដ្ឋិយម និងថា ជាឱកាសសិក្សារៀនសូត្រពីកង្វះខាត ដើម្បីត្រៀមឆ្ពោះទៅព្រឹត្តិការណ៍កីឡាអាស៊ី ឆ្នាំ២០២៦ នៅប្រទេសជប៉ុន ក្នុងខែកញ្ញា ខាងមុខ។
ប្រមុខសហព័ន្ធជឺជីតស៊ូកម្ពុជាមានប្រសាសន៍បែបនេះ “៖ យើងបានមេដាយភាគច្រើនក្នុងវិញ្ញាសាសម្ដែង តែសម្រាប់វិញ្ញាសាប្រយុទ្ធ Newaza យើងប៉ះសុទ្ធតែជើងខ្លាំងកម្រិតខ្ពស់ៗតែម្ដង។ តែវាក៏ល្អដែរសម្រាប់ព្រឹត្តិការណ៍នេះ ព្រោះកៀកនឹង Asian Games នៅ Nagoya ប្រទេសជប៉ុន ក្នុងខែ៩ ហើយគូប្រកួតរបស់យើងពេលនេះ នឹងអាចជួបគ្នាទៀតនៅ Asian Games។ កាលយើងទៅ Asian Beach Games យើងក៏បានជួបដៃគូមួយចំនួនដែរ អ៊ីចឹងយើងបានដឹងពីតិចនិចបច្ចេកទេសរបស់ពួកគាត់ ដើម្បីត្រៀមខ្លួន ហើយបេក្ខជនវិញ្ញាសា Newaza នឹងមានមុខក្នុងការប្រកួតនៅ Asian Games។ សម្រាប់វិញ្ញាសាសម្ដែង ឬ Duo Show យើងធ្វើបានល្អ ដោយយើងអាចឈ្នះបានទាំងមេដាយមាស មេដាយប្រាក់ និងមេដាយសំរឹទ្ធ។”
ឯកឧត្ដម ថោង បញ្ញាធន ឱ្យដឹងដែរថា សហព័ន្ធកីឡាជឺជីតស៊ូកម្ពុជានឹងធ្វើជាម្ចាស់ផ្ទះព្រឹត្តិការណ៍កីឡាជឺជីតស៊ូជើងឯកអាស៊ីអាគ្នេយ៍ នៅខេត្តសៀមរាប ក្នុងខែសីហា ដែលនេះក៏ជាផ្នែកមួយនៃការត្រៀមខ្លួនមុនឈានដល់ព្រឹត្តិការណ៍កីឡាអាស៊ី នៅជប៉ុន។
ជុំវិញការប្រកួតនៅប្រទេសកាហ្សាក់ស្ថាន លោក Jasper Paas គ្រូបង្គោលក្រុមកីឡាជឺជីតស៊ូកម្ពុជាថ្លែងថា កូនក្រុមគ្រប់រូបត្រៀមខ្លួនបានល្អទាំងសមត្ថភាព និងទម្ងន់ខ្លួន តែអ្វីដែលមិនសំណាងល្អនោះ គឺវិញ្ញាសាប្រយុទ្ធបានចាប់ប៉ះកីឡាករប្រទេសលំដាប់ខ្ពស់ ជាពិសេសអារ៉ាប់រួមអេមីរ៉ាត់ ដែលស្ថិតក្នុងចំណោមបេក្ខភាពខ្លាំងៗក្នុងតំបន់។ ទោះបីជាយ៉ាងណា លទ្ធផលមិនខុសគ្នាដាច់ខ្លាំងទេ ពោលត្រឹមមួយពិន្ទុប៉ុណ្ណោះ ក្រៅពីការប្រកួតនៅកាហ្សាក់ស្ថាន គ្រូបង្វឹកជនជាតិហូឡង់រូបនេះបង្ហើបថា ក្រុមកីឡាជឺជីតស៊ូកម្ពុជាបាន និងកំពុងត្រៀមចូលរួមការប្រកួតកម្រិតពិភពលោក ក៏ដូចជាត្រៀមហ្វឹកហាត់នៅសាធារណរដ្ឋកូរ៉េ មុនទៅ Asian Games នៅប្រទេសជប៉ុន។
ក្រុមកីឡាជឺជីតស៊ូកម្ពុជាបាននាំយកមេដាយ៨គ្រឿងពីការប្រកួតកីឡាជឺជីតស៊ូជើងឯកអាស៊ីលើកទី១០ នៅក្រុងអាល់ម៉ាទី ប្រទេសកាហ្សាក់ស្ថាន។ ក្នុងនោះ អត្តពលិកកម្ពុជាប្រជែងបានមេដាយមាស២គ្រឿង ប្រាក់៣ និង សំរឹទ្ធ ៣។
