ភ្នំពេញ៖ ព្រឹត្តិការណ៍ប្រកួតកីឡាវាយសីជ្រើសរើសជើងឯកអាស៊ីអាគ្នេយ៍ ឆ្នាំ២០២៦ “3rd Southeast Asia Badminton Regional Championships 2026” នឹងមានប្រទេសចំនួន ៧ ចូលរួមប្រកួតប្រជែងដណ្តើមមេដាយ ខណៈកម្ពុជានឹងធ្វើជាម្ចាស់ផ្ទះ។
ការរៀបចំព្រឹត្តិការណ៍នេះ មានការចូលរួមពី កម្ពុជា ប្រុយណេ ឡាវ មីយ៉ាន់ម៉ា ទីម័រខាងកើត ហ្វីលីពីន និងវៀតណាម។ ចំនួនប្រទេសចូលរួមនៅឆ្នាំ២០២៦នេះ បានកើនឡើងពីការរៀបចំធ្វើម្ចាស់ផ្ទះ ២លើកកន្លងមក ដែលមានត្រឹមតែ ៥ប្រទេសចូលរួមប៉ុណ្ណោះ។
លោក កែវ រស់ អគ្គលេខាធិការ សហព័ន្ធកីឡាវាយសីកម្ពុជា បានមានប្រសាសន៍ថា ព្រឹត្តិការណ៍ “3rd Southeast Asia Badminton Regional Championships 2026” គ្រោងនឹងប្រព្រឹត្តទៅនៅ ពហុកីឡដ្ឋានជាតិមរតកតេជោ ចាប់ពីថ្ងៃទី ១៥ ដល់ថ្ងៃទី២១ ខែសីហា ឆ្នាំ២០២៦។
លោកបានបញ្ជាក់ថា ក្នុងនាមជាម្ចាស់ផ្ទះ កម្ពុជានឹងបង្ហាញពីសមត្ថភាពក្នុងការរៀបចំព្រឹត្តិការណ៍កីឡាអន្តរជាតិ ព្រមទាំងបង្ហាញពីការគាំទ្រ និងកិច្ចសហប្រតិបត្តិការកីឡាដ៏ល្អប្រសើរពីបណ្តាប្រទេសក្នុងតំបន់អាស៊ីអាគ្នេយ៍។ ជាមួយគ្នានេះ ការរៀបចំព្រឹត្តិការណ៍ក៏ទទួលបានការផ្តល់សិទ្ធិ និងការគាំទ្រយ៉ាងពេញទំហឹងពី សហព័ន្ធកីឡាវាយសីអាស៊ី (Badminton Asia - BA) ផងដែរ។
សម្រាប់ក្រុមម្ចាស់ផ្ទះកម្ពុជា នឹងបញ្ជូនកីឡាករ-កីឡាការិនីចំនួន ១៩រូប ចូលរួមប្រកួតក្នុងវិញ្ញាសាតាមកម្រិតអាយុ ដោយក្នុងនោះមាន ក្រោមអាយុ ២៣ឆ្នាំ ចំនួន ៦រូប, ក្រោមអាយុ ១៩ឆ្នាំ ចំនួន ៧រូប និងក្រោមអាយុ ១៦ឆ្នាំ ចំនួន ៦រូប។
ការប្រកួតនេះ ត្រូវបានរំពឹងថានឹងក្លាយជាវេទិកាដ៏សំខាន់សម្រាប់កីឡាករ-កីឡាការិនីវ័យក្មេងក្នុងតំបន់អាស៊ីអាគ្នេយ៍ ដើម្បីបង្កើនបទពិសោធន៍ និងសមត្ថភាពប្រកួតប្រជែងលើឆាកអន្តរជាតិ ព្រមទាំងជំរុញការអភិវឌ្ឍវិស័យកីឡាវាយសីនៅក្នុងតំបន់ផងដែរ៕
