អ្នកប៉ះសេដៃឆ្នើម សួន ចាន់ណារ៉ូ បានទម្លាយពីមូលហេតុពិតប្រាកដដែលធ្វើឱ្យរូបគេសម្រេចចិត្តវិលត្រឡប់មកគ្រងអាវក្រុមកីឡាបាល់ទះជម្រើសជាតិកម្ពុជាសារជាថ្មី គឺដោយសារតែ "ចិត្តឈឺចាប់" ចំពោះបរាជ័យកាលពីព្រឹត្តិការណ៍ SEA V Cup ឆ្នាំ២០២៥ និងបំណងប្រាថ្នាចង់ឃើញកម្ពុជាទទួលបានលទ្ធផលល្អប្រសើរឡើងវិញ។
ប្រធានក្រុមជម្រើសជាតិរូបនេះបានគូសបញ្ជាក់ថា គោលដៅដើមនៃការត្រឡប់មកវិញសម្រាប់ឆ្នាំ២០២៦ គឺយ៉ាងហោចណាស់ក៏ចង់ជួយក្រុមឱ្យបញ្ចប់នៅតំណែង Top 3 ដែរ។ ប៉ុន្តែលទ្ធផលជាក់ស្តែងពិតជាអស្ចារ្យលើសពីការរំពឹងទុក ដោយក្រុមកីឡាបាល់ទះជម្រើសជាតិកម្ពុជា បានបង្កើតប្រវត្តិសាស្ត្រគ្រងជើងឯក SEA V Cup (ជើងទី១) យ៉ាងជោគជ័យ។
គួរបញ្ជាក់ថា សួន ចាន់ណារ៉ូ បានប្រកាសចូលនិវត្តន៍ពីជម្រើសជាតិតាំងពីចុងឆ្នាំ២០២៤។ ចំពោះអនាគតបន្ទាប់ពីនេះ រូបគេបានសង្កត់ធ្ងន់ថា ការបន្តបេសកកម្មបម្រើជាតិទៀត ឬយ៉ាងណានោះ គឺអាស្រ័យលើកត្តាសុខភាពជាចម្បង ខណៈបេះដូងរបស់គេនៅតែចង់ជួយជម្រើសជាតិជានិច្ច។
កីឡាករឆ្នើមប្រចាំក្រុមកីឡាបាល់ទះស្នងការដ្ឋាននគរបាលខេត្តស្វាយរៀង ក៏បានរួមចំណែកសំខាន់ជួយក្រុមជម្រើសជាតិបាល់ទះកម្ពុជាឈ្នះមេដាយសំរឹទ្ធ ស៊ីហ្គេម ២០២១ និងមេដាយប្រាក់ស៊ីហ្គេម ២០២៣ ផងដែរ៕
