ការប្រកួតកីឡាបាល់ទាត់កុមារ Daiichi Junior Cup 2026 ជាវេទិកាដ៏សំខាន់ក្នុងការបណ្តុះបណ្តាល ការរៀបចំ និងផ្តល់ឱកាសដល់កុមារនៅតាមបណ្តាខេត្តបានចូលរួមប្រកួតប្រជែងលើទីលានខ្នាតតូចប្រកបដោយស្តង់ដារ។ នេះបើតាមការលើកឡើងរបស់លោក ង៉ែត វុទ្ធី តំណាងគណៈកម្មការរៀបចំការប្រកួត។
លោក ង៉ែត វុទ្ធី បានសង្កត់ធ្ងន់ថា ការចាប់ផ្តើមពីទីលានខ្នាតតូច ផ្តល់ភាពងាយស្រួលក្នុងការបណ្តុះបណ្តាលកុមារ ដោយសារពួកគេមានឱកាសប៉ះ និងលេងបាល់បានច្រើន ខុសប្លែកពីទីលានធំដែលទាមទារចំនួនមនុស្សច្រើន និងកលល្បិចស្មុគស្មាញ។ ទីលានតូចនេះហើយដែលអនុញ្ញាតឱ្យកុមារអាចបញ្ចេញសមត្ថភាព និងបច្ចេកទេសផ្ទាល់ខ្លួនបានពេញលេញ។
លោកបានបន្ថែមថា ព្រឹត្តិការណ៍នេះនឹងកាន់តែរីកចម្រើនខ្លាំងនៅឆ្នាំបន្តបន្ទាប់ ដោយសារទទួលបានការគាំទ្រ និងការចូលរួមតាមដានយ៉ាងសកម្មលើការរៀបចំបច្ចេកទេសពីសហព័ន្ធកីឡាបាល់ទាត់កម្ពុជា ក្រសួងអប់រំ យុវជន និងកីឡា គណៈកម្មាធិការជាតិអូឡាំពិកកម្ពុជា ព្រមទាំងស្ថាប័នធំៗផ្សេងទៀត។ ទាំងនេះក៏ជាកាតាលីករដ៏សំខាន់ក្នុងការបើកផ្លូវឱ្យវិស័យឯកជនចូលរួមអភិវឌ្ឍវិស័យបាល់ទាត់កុមារផងដែរ។
លើសពីការប្រកួតនៅលើទីលាន លោក ង៉ែត វុទ្ធី បានគូសបញ្ជាក់ថា Daiichi Junior Cup ក៏បានបង្រៀនដល់ក្រុមបាល់ទាត់តាមខេត្តឱ្យចេះរៀបចំឯកសារបានត្រឹមត្រូវ និងស្វែងយល់ពីការដាក់ពិន្ទុតាមប្រព័ន្ធឌីជីថល (Digital) ទៀតផង។ ការប្រកួតដ៏ពិសេសនេះទទួលបានការគាំទ្រយ៉ាងខ្លាំងក្លាពីសំណាក់ក្រុមចូលរួម និងអាណាព្យាបាលលើសពីការរំពឹងទុក។
ព្រឹត្តិការណ៍នេះស្ថិតក្នុងចក្ខុវិស័យរយៈពេលវែង ដោយនៅរដូវកាលក្រោយៗ គណៈកម្មការអាចនឹងបន្ថែមចំនួនក្រុមចូលរួម ឬបង្កើតវិញ្ញាសាកម្រិតអាយុក្រោម ១០ឆ្នាំ (U10) បន្ថែមទៀត។
គួររំឭកថា Daiichi Junior Cup 2026 បានចាប់ផ្តើមយុទ្ធនាការជម្រុះដំបូងកាលពីថ្ងៃទី៣១ ខែមេcontacts/ឧសភា ឆ្នាំ២០២៦ នៅទីលានផ្ការីកគ្រប់រដូវ រាជធានីភ្នំពេញ រួចបន្តទៅខេត្តបាត់ដំបងក្នុងខែមិថុនា និងខេត្តសៀមរាបនាខែកក្កដា។ សម្រាប់ការប្រកួតលើកទី៤ និងទី៥ បានត្រឡប់មកកាន់រាជធានីភ្នំពេញវិញ ដែលជាវគ្គជម្រុះថ្នាក់ជាតិ និងវគ្គផ្តាច់ព្រ័ត្រ (Grand Final)។
ការប្រកួតនេះចែកចេញជា ២ កម្រិតអាយុ គឺក្រោម ១២ឆ្នាំ (U12) និងក្រោម ១៤ឆ្នាំ (U14)។ ជាលទ្ធផលបន្ទាប់ពីការប្រកួតយ៉ាងស្វិតស្វាញ ក្រុមសាលាពស់កេងកង បានគ្រងជើងឯកលើវិញ្ញាសាអាយុក្រោម ១២ឆ្នាំ ខណៈក្រុមយុវជនសៀមរាបយូណាយធីត ដណ្តើមបានជើងឯកលើវិញ្ញាសាអាយុក្រោម ១៤ឆ្នាំ៕
