ខ្សែបម្រើឆ្នើម និងជាប្រធានក្រុម ISI Dangkor Senchey កីឡាករ ប៊ិន ចន្ថាធារី (Bin Chantha Thierry) បានបង្ហាញនូវក្តីសប្បាយរីករាយយ៉ាងខ្លាំង ដែលបានរួមចំណែកជាមួយសាលាបាល់ទាត់ CJ Coaching ក្នុងការផ្តល់ឱកាសមាសដល់យុវជនកម្ពុជា បានបញ្ចេញសមត្ថភាព និងបង្កើតផ្លូវឈានទៅធ្វើជាកីឡាករអាជីពនាពេលអនាគត។
ការគូសបញ្ជាក់នេះ ធ្វើឡើងក្នុងពិធីបិទព្រឹត្តិការណ៍ប្រកួតកីឡាបាល់ទាត់ CJ Summer League 2026 (អាយុក្រោម ១៨ឆ្នាំ) នាពេលថ្មីៗនេះ នៅតារាង Down Town Sports ដោយរូបលោកបានវាយតម្លៃខ្ពស់ចំពោះទម្រង់ប្រកួតនេះ ថាជាវេទិកាដ៏ល្អឥតខ្ចោះសម្រាប់យុវជន។
កីឡាករ ប៊ិន ចន្ថាធារី បានរៀបរាប់ថា៖ «ការប្រកួតនេះពិតជាល្អខ្លាំងណាស់ ព្រោះបានផ្ដល់ឱកាសដល់ក្មេងៗកំឡុងពេលសម្រាកវិស្សមកាល បានចូលលេងកីឡា បញ្ចេញសមត្ថភាព និងប្រកួតប្រជែងគ្នា។ មិនតែប៉ុណ្ណោះ យុវជនដែលមានសមត្ថភាពលេចធ្លោ ក៏មានឱកាសបានទៅប្រកួតប្រជែងលើឆាកអន្តរជាតិ តទល់ជាមួយក្រុមក្រៅប្រទេសទៀតផង»។
កីឡាករសម្បូរពិសោធប្រកួតប្រជែងនៅលីគក្រៅប្រទេសរូបនេះ បានបន្ថែមទៀតថា៖ «ដូចខ្ញុំធ្លាប់ប្រាប់ជាច្រើនដងមកហើយ ផ្អែកលើបទពិសោធដែលខ្ញុំមាន ខ្ញុំពិតជាចង់ជួយបាល់ទាត់ខ្មែរណាស់។ ទោះជាមានឱកាសតិចឬច្រើនក្តី បេះដូងខ្ញុំគឺចង់ជួយជានិច្ច। ខ្ញុំបានធ្វើការជាមួយ CJ Coaching រយៈពេល ៥ឆ្នាំមកហើយ ហើយខ្ញុំសប្បាយចិត្តខ្លាំងណាស់ដែលបានរួមចំណែកបង្កើតឱកាសសម្រាប់អនាគតបាល់ទាត់កម្ពុជា»។
គេបានបន្តទៀតថា៖ «សម្រាប់ខ្ញុំ CJ Coaching គឺជាសាលាបាល់ទាត់លេខ១ នៅកម្ពុជា ព្រោះបានជួយកុមារ និងយុវជនជាច្រើន ទាំងនៅក្នុងសាលាអន្តរជាតិ និងខាងក្រៅ ឱ្យពួកគេបានហាត់ប្រាណ លេងកីឡា និងអភិវឌ្ឍជំនាញបាល់ទាត់តាំងពីអាយុនៅក្មេងៗ»។
ទាក់ទិននឹងការប្រកួតនេះដែរ លោក តាំង សុខឡេង តំណាងគណៈកម្មការរៀបចំការប្រកួត បានឱ្យដឹងថា ព្រឹត្តិការណ៍ CJ Summer League 2026 មានការចូលរួមពី ៦ ក្រុម ដោយប្រកួតប្រជែងលើទម្រង់ ៧ ស្មើ ចែកជា ២ ដំណាក់កាល និងស៊ីពេលសរុប ៥ សប្ដាហ៍។
ក្រុមចូលរួមទាំង ៦ មាន៖
NOVA FT
HFCA
Night Eagle
5IVE GUYS
Point to Point
Phnom Penh Saint Germain
ជាលទ្ធផល បន្ទាប់ពីការប្រកួតប្រជែងយ៉ាងស្វិតស្វាញ និងតឹងតែងកន្លងមក ក្រុម NOVA FT បានសម្តែងទម្រង់លេងយ៉ាងលេចធ្លោ និងបានគ្រង តំណែងជើងឯក (Champion) សម្រាប់រដូវកាលទី១ នេះដោយជោគជ័យ៕
