ភ្នំពេញ៖ ថ្លែងក្នុងមហាសន្និបាតបញ្ចប់អាណត្តិចាស់ និងបន្តអាណត្តិថ្មី ឆ្នាំ២០២៦-២០៣០ ដែលធ្វើឡើងនៅទីស្នាក់ការ NOCC កាលពីថ្ងៃទី០៧ ខែកញ្ញា ឆ្នាំ២០២៦ ឯកឧត្តម សរ សិទ្ធិ ប្រធានសហព័ន្ធកីឡាសូហ្វតិន្នីសកម្ពុជា បានផ្តល់គន្លឹះសំខាន់ៗចំនួន ៥ ដើម្បីជំរុញការអភិវឌ្ឍកីឡាសូហ្វតិន្នីសឱ្យកាន់តែរីកចម្រើន និងមានសមត្ថភាពប្រកួតប្រជែងទាំងក្នុង និងក្រៅប្រទេស។
គន្លឹះទាំង ៥ រួមមាន៖
ទី១. ពង្រឹងការគ្រប់គ្រង និងអភិបាលកិច្ចល្អ ដោយរៀបចំរចនាសម្ព័ន្ធការងារឱ្យមានប្រសិទ្ធភាព និងបែងចែកតួនាទី ភារកិច្ច និងការទទួលខុសត្រូវឱ្យបានច្បាស់លាស់។
ទី២. ពង្រីកការផ្សព្វផ្សាយ និងស្វែងរកយុវជនជំនាន់ក្រោយ តាមរយៈប្រព័ន្ធផ្សព្វផ្សាយ សកម្មភាពតាមសាលារៀន និងសាកលវិទ្យាល័យ ព្រមទាំងសហការជាមួយក្រសួងអប់រំ យុវជន និងកីឡា ដើម្បីស្វែងរក និងបណ្តុះបណ្តាលធនធានកីឡាករថ្មីៗ។
ទី៣. លើកកម្ពស់សមត្ថភាពគ្រូបង្វឹក និងអាជ្ញាកណ្តាល តាមរយៈវគ្គបណ្តុះបណ្តាល និងសិក្ខាសាលាទាំងក្នុង និងក្រៅប្រទេស ព្រមទាំងការផ្លាស់ប្តូរបទពិសោធជាមួយអ្នកជំនាញអន្តរជាតិ ដើម្បីធ្វើឱ្យបច្ចេកទេសហ្វឹកហ្វឺន និងការកាត់សេចក្តីស្របតាមស្តង់ដារ។
ទី៤. អភិវឌ្ឍហេដ្ឋារចនាសម្ព័ន្ធ និងសម្ភារកីឡា ដោយពង្រឹងគុណភាពទីលានហ្វឹកហាត់ និងប្រកួត ព្រមទាំងស្វែងរកការគាំទ្រពីវិស័យឯកជន តាមរយៈភាពជាដៃគូ និងការឧបត្ថម្ភ។
ទី៥. បង្កើនការប្រកួតប្រជែងក្នុងស្រុក និងអន្តរជាតិ ដោយរៀបចំការប្រកួតចាប់ពីកម្រិតយុវជន សាលារៀន រហូតដល់ថ្នាក់ជាតិ និងបញ្ជូនកីឡាករ-កីឡាការិនីមានសមត្ថភាពទៅប្រកួតអន្តរជាតិ ដើម្បីពង្រឹងបទពិសោធ និងសមត្ថភាពប្រកួតប្រជែង។
គួរបញ្ជាក់ថា សហព័ន្ធកីឡាសូហ្វតិន្នីសកម្ពុជា អាណត្តិទី៤ ឆ្នាំ២០២៦-២០៣០ បានបន្តជ្រើសតាំង លោក សរ សិទ្ធិ ជាប្រធាន, លោក យិត ភីរៈ ជាអគ្គលេខាធិការ និង លោក អ៊ាន សុភ័ក្រ្ត ជាអគ្គហេរញ្ញិក៕
