ការចូលរួមជ្រោមជ្រែង និងការគាំទ្រយ៉ាងសកម្មពីសំណាក់វិស័យឯកជន នឹងក្លាយជាកម្លាំងចលករដ៏សំខាន់ក្នុងការជំរុញឱ្យការរៀបចំព្រឹត្តិការណ៍កីឡាវ៉ូវីណាមជើងឯកអាស៊ី (Asian Vovinam Championship) ឆ្នាំ២០២៦ ដែលកម្ពុជានឹងធ្វើជាម្ចាស់ផ្ទះនៅខែវិច្ឆិកាខាងមុខ ប្រព្រឹត្តទៅដោយរលូន អធិកអធម និងកាន់តែពិសេសវិសេសវិសាល។
កីឡាករ ម៉េត សុភ័ក្ត្រា និងកីឡាការិនី ឯម ចាន់កណ្ណិកា បានសម្តែងនូវក្តីរំភើប និងលើកឡើងថា ការចូលរួមឧបត្ថម្ភពីក្រុមហ៊ុនឯកជន គឺជា «កម្លាំងចិត្តដ៏ធំធេង» សម្រាប់ក្រុមអត្តពលិកជម្រើសជាតិ។ ការខិតខំប្រឹងប្រែងហ្វឹកហាត់ និងស្មារតីប្រកួតប្រជែង នឹងត្រូវពង្រឹងទ្វេដង ដើម្បីស្វែងរកឱកាសដណ្តើមមេដាយជូនជាតិមាតុភូមិ ព្រមទាំងបង្ហាញពីសមត្ថភាពរបស់អត្តពលិកកម្ពុជានៅលើឆាកអន្តរជាតិ។
ដោយផ្អែកលើស្មារតីគាំទ្រវិស័យកីឡា លោក Lee Sang Ho អគ្គនាយកក្រុមហ៊ុន Camko Hyundai បានបញ្ជាក់ពីមូលហេតុនៃការសម្រេចចិត្តចូលរួមឧបត្ថម្ភដល់សហព័ន្ធកីឡាវ៉ូវីណាមកម្ពុជា ថា ក្រុមហ៊ុនតែងតែឈរនៅពីក្រោយ និងចូលរួមគាំទ្រព្រឹត្តិការណ៍កីឡានានាកន្លងមក។ ដោយឡែក សម្រាប់កីឡាវ៉ូវីណាម លោកបានមើលឃើញយ៉ាងច្បាស់ពី «សមត្ថភាព និងសក្តានុពលដ៏អស្ចារ្យ» របស់អត្តពលិកកម្ពុជា ដែលជាហេតុធ្វើឱ្យលោកមានជំនឿចិត្តយ៉ាងមុតមាំថា ក្រុមជម្រើសជាតិកម្ពុជានឹងបង្កើតស្នាដៃ និងសម្រេចបានជោគជ័យយ៉ាងត្រចះត្រចង់នៅក្នុងព្រឹត្តិការណ៍ថ្នាក់អាស៊ីមួយនេះ។
ថ្នាក់ដឹកនាំរូបនេះបានបញ្ជាក់បន្ថែមដោយក្តីប្តេជ្ញាចិត្តថា ការចូលរួមជួយជ្រោមជ្រែងនាពេលនេះ មិនមែនជាលើកចុងក្រោយឡើយ ហើយក្រុមហ៊ុនមានឆន្ទៈយ៉ាងមុតមាំក្នុងការបន្តឈរប្រកៀកស្មាជាមួយសហព័ន្ធកីឡាវ៉ូវីណាមកម្ពុជាតទៅមុខទៀត។ ទន្ទឹមនឹងនេះ លោកបានសម្តែងការកោតសរសើរចំពោះការដឹកនាំប្រកបដោយឆន្ទៈ និងចក្ខុវិស័យវែងឆ្ងាយរបស់ ឯកឧត្តម អ៊ូ រតនា ប្រធានសហព័ន្ធ ព្រមទាំងបានផ្ញើសារលើកទឹកចិត្តដល់កីឡាករ-កីឡាការិនីទាំងអស់ ឱ្យខិតខំប្រកួតអស់ពីកម្លាំងកាយចិត្ត ដើម្បីនាំយកកិត្តិយសជូនជាតិ។
សូមជម្រាបជូនថា សហព័ន្ធកីឡាវ៉ូវីណាមកម្ពុជា ទទួលបានសិទ្ធិធ្វើជាម្ចាស់ផ្ទះរៀបចំព្រឹត្តិការណ៍កីឡាវ៉ូវីណាមជើងឯកអាស៊ី ឆ្នាំ២០២៦ ដែលគ្រោងនឹងប្រព្រឹត្តទៅនៅខែវិច្ឆិកាខាងមុខនេះ នៅពហុកីឡដ្ឋានជាតិអូឡាំពិក ដោយមានអត្តពលិកកំពូលៗមកពីជាង ២០ប្រទេសក្នុងតំបន់អាស៊ី ចូលរួមប្រកួតប្រជែង៕
