នៅរសៀលថ្ងៃព្រសហ្បតិ៍ ទី១៤ ខែសីហា ឆ្នាំ២០២៥ នាសាលប្រជុំតុមូល
នៃគណៈកម្មាធិការជាតិអូឡាំពិកកម្ពុជា ក្រុមជំនុំសិក្សាស្រាវជ្រាវគម្ពីរអាថ៌កំបាំងយុទ្ធគុនបុរាណដូនតាខ្មែរ បានទទួលប្រតិភូសមាគម មូលនិធិសន្តិភាព និងការអភិវឌ្ឍចិន ដើម្បីរៀបចំការជំនុំផ្ដោតលើទំនាក់ទំនងមិត្តភាពជាប្រវត្តិសាស្ត្ររវាង កម្ពុជា ចិន។
ឯកឧត្ដម វ៉ាត់ ចំរើន អនុប្រធានអចិន្ដ្រៃយ៍ និងជាប្រធានអនុគណៈកម្មការប្រតិបត្តិ នៃគណៈកម្មការស្រាវជ្រាវគម្ពីអាថ៌កំបាំងយុទ្ធគុនដូនតាខ្មែរ មានប្រសាសន៍ថា សារៈសំខាន់នៃកិច្ចប្រជុំនេះ គឺក្រុមជំនុំសិក្សាស្រាវជ្រាវកំពុងស្វែងរកចំណុចពិសេសមួយ ថាតើយុទ្ធគុនខ្មែរតាំងពីសម័យអង្គរ មានពាក់ព័ន្ធអ្វីទៅនឹងក្បាច់គុនចិន ឬទេ។
ឯកឧត្ដម វ៉ាត់ ចំរើន សង្កត់ធ្ងន់ថា "៖ នេះជាចំណុចដែលជាសំណួរ ហើយសំណួរនេះយើងចង់បានពីមិត្តចិន ពីអ្នកស្រាវជ្រាវ ជាពិសេសប្រធានសមាគមមិត្តភាពកម្ពុជាចិន ឯកឧត្ដម ជា មុនីរិទ្ធិ ដែលគាត់បានធ្វើ បទបង្ហាញមួយចំនួន ដែលយើងអាចទាញយកទឡ្ហីករណ៍សម្រាប់ការស្រាវជ្រាវ។ ក្បាច់គុនរបស់ ចិន ក្នុងឯកសារផ្សេងៗ របស់ប្រវត្តិសាស្ត្រខ្មែរយើងក៏មានការនិយាយថា យើងមានក្បាច់គុនជាច្រើន ដូចជា ល្បុក្កតោ ស្រងែពែន ខ្លាក្រាប ហើយក៏មានពាក្យក្បាច់គុនចិន នៅក្នុងក្បាច់គុនខ្មែរដែរ។ ដូច្នេះយើងស្វែងរកប្រភពហ្នឹង ដើម្បីទាញយកសេចក្ដីសន្និដ្ឋាន បែបវិទ្យាសាស្ត្រ មានលក្ខណៈយោងត្រឹមត្រូវ។ អ៊ីចឹងយើងឃើញថា អ្វីដែលជាការទាក់ទាញបំផុតរបស់ក្រុមការងារយើង គឺយើងទទួលបានចំណុចពិសេសៗជាច្រើន។
ជាក់ស្ដែង កាលណាមានការផ្លាស់ប្ដូរយោធា ឬកងទ័ពគ្នានៅសម័យអង្គរ រវាងចិន និងខ្មែរ ប្រាកដថា អាចមានការផ្លាស់ប្ដូរក្បាច់គុនគ្នាហើយ មិនអត់ទេ។ ដូច្នេះអ្វីដែលសមាគមមិត្តភាពកម្ពុជា ចិន បានមកដល់ទីនេះ គឺនឹងខិតខំប្រឹងប្រែងជួយដល់ក្រុមជំនុំ របស់យើង ដើម្បីស្វែងរកធាតុសមស្របទៅនឹងអ្វីដែលយើងចង់បាន។ សាស្ត្រាចារ្យរបស់យើងក៏ទទួលស្គាល់ថា មានទំនាក់ទំនងហ្នឹងហើយ។"
ឯកឧត្ដម វ៉ាត់ ចំរើន បានបន្ថែមថា គណៈកម្មការនឹងស្វែងរកបន្ថែមទៀត ថាតើនឹងមានទំនាក់ទំនងលើសពីនេះទៀតទេ រវាងក្បាច់គុនខ្មែរ និងចិន តាំងពីមុនសម័យអង្គរ និងតាំងពីសម័យចេនឡាជាដើម ដើម្បីស្វែងរកសេចក្ដីសន្និដ្ឋានរួមឱ្យគម្ពីរក្បាច់បុរាណខ្មែរ មានលក្ខណៈគ្រប់គ្រាន់ទាំងបែបវិទ្យាសាស្ត្រ និងវប្បធម៌ អរិយធម៌ពិសេសក្នុងទំនាក់ទំនងកម្ពុជាចិន៕
