ការធ្វើជាម្ចាស់ផ្ទះនៃកិច្ចប្រជុំឧត្ដមមន្ត្រីកីឡាអាស៊ាន ឆ្នាំ២០២៦ និង កិច្ចប្រជុំរដ្ឋមន្រ្តីកីឡាអាស៊ាន ឆ្នាំ២០២៧ ជាឱកាសនៃការទាក់ទាញការគាំទ្រ និង បង្ហាញពីប្រសិទ្ធភាពនៃការរៀបចំដើម្បីទទួលបានការគាំទ្រពីអាស៊ាន និង ដៃគូអាស៊ាន។ នេះបើតាមប្រសាសន៍ឯកឧត្តម វ៉ាត់ ចំរើន រដ្ឋលេខាធិការក្រសួងអប់រំ យុវជន និង កីឡា។
ឯកឧត្តមរដ្ឋលេខាធិការបន្តថា ការធ្វើជាម្ចាស់ផ្ទះនៃកិច្ចប្រជុំដ៏សំខាន់ទាំង២ក៏បង្ហាញថា កម្ពុជាជាប្រទេសស្រលាញ់សុខសន្តិភាព ដែលនេះជាសារផ្ញើទៅកាន់ពិភពលោកដែរថា កីឡានាំមកនូវសន្តិភាព កីឡារស់ក្នុងសន្តិភាព និងឱ្យអាស៊ានបានឃើញពីខិតខំរបស់កម្ពុជាដែលបានប្រឹងប្រែងដើម្បីសុខមាលភាព សេចក្ដីសុខ និងចៀសវៀងពីបញ្ហាវិវាទនានា។ ទន្ទឹមនឹងនេះ ក្រោយពីទទួលបានជោគជ័យក្នុងការធ្វើម្ចាស់ផ្ទះស៊ីហ្គេម និងអាស៊ានប៉ារ៉ាហ្គេម ២០២៣ កម្ពុជានឹងធ្វើជាម្ចាស់ផ្ទះកីឡាសាកលវិទ្យាល័យអាស៊ាន ២០២៨ និង កីឡាយុវជនអាស៊ី និង ប៉ារ៉ាយុវជនអាស៊ី ឆ្នាំ២០២៩។
ឯកឧត្តម វ៉ាត់ ចំរើន មានប្រសាសន៍ដែរថា ឯកឧត្តមនឹងដឹកនាំគណៈប្រតិភូពីក្រសួងអប់រំ យុវជន និង កីឡា ចូលរួមកិច្ចប្រជុំឧត្ដមមន្ត្រីកីឡា និង រដ្ឋមន្ត្រីកីឡាអាស៊ានពីថ្ងៃទី១៣ដល់ថ្ងៃទី១៧ ខែកញ្ញា នារដ្ឋធានីហាណូយ ប្រទេសវៀតណាម។ នេះក៏ជាឱកាសដាក់ចេញយុទ្ធសាស្ត្រដល់ប្រទេសឯទៀតបានដឹងពីការត្រៀមខ្លួនរបស់កម្ពុជាក្នុងការធ្វើម្ចាស់ផ្ទះកិច្ចប្រជុំដ៏ធំទាំង២ក្នុងឆ្នាំ២០២៦ និង ២០២៧។
កម្ពុជាបានត្រៀមលក្ខណៈពេញលេញក្នុងការធ្វើជាម្ចាស់ផ្ទះឱ្យបានល្អ និងទទួលបានជោគជ័យ ហើយតាមគម្រោងនឹងធ្វើនៅខេត្តសៀមរាប។ ឆ្លៀតក្នុងឱកាសនោះ កម្ពុជានឹងស្វែងរកការគាំទ្រលើការរៀបចំព្រឹត្តិការណ៍សម្ដែង ឬការប្រកួតកីឡាប្រពៃណីអាស៊ានដែលអាចធ្វើឡើងនៅខេត្តសៀមរាប៕
