ភ្នំពេញ៖ ខណៈពេលនៃព្រឹត្តិការណ៍ រត់ប្រណាំងពាក់កណ្ដាលម៉ារ៉ាតុងអន្តរជាតិអង្គរ លើកទី៣០ កំពុងតែខិតចូលមកដល់នាពេលឆាប់ៗខាងមុខនេះ ពោលគឺនៅថ្ងៃទីទី៧ ខែធ្នូ ឆ្នាំ២០២៥ គឺមានភ្ញៀវជាតិ និងអន្តរជាតិ១៦០០នាក់ មកពី៨៦ប្រទេសជុំវិញពិភពលោកបានចូលរួមចុះឈ្មោះរួចរាល់ ដោយក្នុងនោះមានភ្ញៀវអន្តរជាតិ៣០០០នាក់ជាង។
ពាក់កណ្ដាលម៉ារ៉ាតុងអន្តរជាតិអង្គរ គឺជាព្រឹត្តិការណ៍រត់ប្រណាំងដ៏ធំជាងគេនៅកម្ពុជា ក្នុងចំណោមព្រឹត្តិការណ៍រត់ប្រណាំងផ្សេងៗ។ ឆ្នាំនេះជាខួបលើកទី៣០ នៃព្រឹត្តិការណ៍រត់ប្រណាំងនេះផង ដូច្នេះការរៀបចំ និងកម្មវិធីកម្សាន្តនឹងរៀបចំឡើងកាន់តែពិសេសសម្រាប់អ្នកចូលរួម។
នេះជាឆ្នាំដំបូងហើយដែលមានអ្នកចុះឈ្មោះចូលរួមលើកការរំពឹងទុក ខណៈដែរកាលពីឆ្នាំមុន(២០២៤)មាន អ្នកចូលរួមរត់ក្នុងព្រឹត្តិការណ៍ពាក់ម៉ារ៉ាតុងអង្គរនេះមានត្រឹមតែជាង ១៤០០០នាក់ប៉ុណ្ណោះ។
ជាមួយគ្នានេះដែរតាមសេចក្តីប្រកាសរបស់គណៈកម្មការម៉ារ៉ាតុងកម្ពុជាបានឱ្យដឹងថា៖ គណៈកម្មការរៀបចំការរត់ប្រណាំងនឹងមិនអនុញ្ញាតឲ្យអ្នកដែលមិនបានចុះឈ្មោះទុកជាមុន ឬគ្មានស្លាកលេខបំពាក់លើខ្លួន ចូលរួមរត់ប្រណាំងឡើយ។
គណៈកម្មការនឹងមានក្រុមការងារត្រួតពិនិត្យមុនពេលចេញដំណើរដើម្បីជៀសវាងបញ្ហាប៉ះពាល់ដល់ការរៀបចំ ទឹក ភេសជ្ជៈបំប៉នសុខភាពដល់អ្នកចូលរួមទាំងអស់ដែលបានចុះឈ្មោះពិតប្រាកដ។
ជាពិសេសការរក្សាសុវត្ថិភាព និងទិន្នន័យសំគាល់ខ្លួនជាចាំបាច់តាមរយៈ ស្លាកលេខរត់ (Race Bib) របស់កីឡាករ កីឡាការិនី នៅពេលដែលមានឧបទ្ទវហេតុចៃដន្យក្នុងពេលរត់ប្រណាំង។
ការប្រកាសរបស់គណៈកម្មការរៀបចំបែបនេះ បន្ទាប់ពីព្រឹត្តិការណ៍កន្លងមកក៏មានអ្នកមិនបានចុះឈ្មោះ ឬគ្មានស្លាកលេខសំគាល់ក៏បានចូលរួមច្រើនដែរដែលធ្វើឲ្យពិបាកក្នុងការគ្រប់គ្រង និងទិន្នន័យពិតប្រាកដនៃអ្នកចូលរួម។
គួបញ្ជាក់ផងដែរថា៖ អ្នកដែលបានចុះឈ្មោះទាំងអស់ត្រូវទៅទទួលយកសម្ភារៈសម្រាប់ការចូលរួមរត់នៅសណ្ឋាគារ ខនយ៉ាត តាមផ្លូវជាតិលេខ 6A ភូមិចុងកៅស៊ូ ឃុំស្លក្រាម ក្រុងសៀមរាប នៅថ្ងៃទី ៤ ដល់ ទី៦ ខែធ្នូ ចាប់ពីម៉ោង ៩ព្រឹកដល់ ម៉ោង ៦ល្ងាចជាកំហិត៕
