ខេត្តសៀមរាប៖ព្រឹត្តិការណ៍ទិវារត់ប្រណាំងពាក់កណ្ដាលម៉ារ៉ាតុងអន្តរជាតិអង្គរលើកទី៣០ឆ្នាំ២០២៥នៅលើទឹកដីនៃខេត្តសៀមរាប កាលពីព្រឹកថ្ងៃ៧ខែធ្នូឆ្នាំ២០២៥មានភ្ញៀវជាតិនិងអន្តរជាតិមកពីបណ្ដាប្រទេសនៅលើពិភពលោកចូលរួមរត់ចំនួន១៦០០០នាក់មកពីជាង៨០ប្រទេស។
ឯកឧត្តម ស៊ុន ចាន់ថុល ឧបនាយករដ្ឋមន្ត្រីតំណាងដ៏ខ្ពង់ខ្ពស់សម្ដេចមហាបវរធិបតីនាយករដ្ឋមន្ត្រីនៃព្រះរាជាណាចក្រកម្ពុជា បានសម្ដែងនូវការស្វាគមន៍យ៉ាងកក់ក្ដៅចំពោះវត្តមានភ្ញៀវជាតិនិងអន្តរជាតិដែលបានធ្វើដំណើរមកកាន់អង្គរបេតិកភណ្ឌពិភពលោកដ៏មានតម្លៃមិនអាចកាត់ថ្លៃបាន។ជាពិសេសក្នុងការចូលរួមក្នុងព្រឹត្តិការណ៍ទិវារត់ប្រណាំងពាក់កណ្ដាលម៉ារ៉ាតុងអន្តរជាតិអង្គរលើកទី៣០ដែលបានញាំងឱ្យកម្មវិធីដ៏អស្ចារ្យមួយនេះមានភាពអធិកអធមក្រៃលែង។
ឯកឧត្តម បានមានប្រសាសន៍ឱ្យបានដឹងបន្តទៀតថាព្រឹត្តិការណ៍ទិវារត់ប្រណាំងពាក់កណ្ដាលម៉ារ៉ាតុងអន្តរជាតិអង្គរលើកទី៣០នេះបានស្រូបទាញភ្ញៀវទេសចរណ៍១៦០០០នាក់កើនឡើង២៥ភាគរយបើប្រៀបធៀបកាលពីឆ្នាំ២០២៤។ដែលមានអត្តពលិកអន្តរជាតិ៣៣៦២នាក់មកពី៨៦ប្រទេសមានបារាំង អូស្ត្រាលី អាមេរិកាំងនិងជប៉ុនចូលរួមច្រើនជាងគេ។ឯកឧត្តមស្វាគមន៍យ៉ាងកក់ក្ដៅចំពោះបងប្អូនជនរួមជាតិនិងមិត្តភក្តិបរទេសដែលបានមកជាលើកដំបូងនិងវិលមកសាជាថ្មីម្ដងទៀតដោយដក់ចិត្តស្រឡាញ់នឹងកម្ពុជា។ទោះបីយើងមកពីប្រទេសផ្សេងគ្នានិយាយភាសាខុសគ្នា។ប៉ុន្តែថ្ងៃនេះយើងនិយាយភាសាតែមួយគឺភាសាកីឡានិងសាមគ្គីភាព។
ឯកឧត្តមបានសង្កត់ធ្ងន់ថាការដែលយើងបានជួបជុំគ្ន្នាថ្ងៃនេះមិនមែនភាពរឿងចៃដន្យនោះទេ នេះជារឿងផ្លែផ្កានៃសុខសន្តិភាព ពេញលេញ។ ដូចពាក្យស្លោកពោលថា"កីឡារស់ក្នុងសន្តិភាព"។កីឡានាំមកនូវសុខភាព និងសាមគ្គីភាពរវាងប្រជាជាតិ។
គួររម្លឹកថាព្រឹត្តិការណ៍ទិវារត់ប្រណាំងម៉ារ៉ាតុងអន្តរជាតិជាតិអង្គរលើកទី៣០ឆ្នាំ២០២៥ដែលបានប្រព្រឹត្តទៅនៅមុខបរិវេណអង្គរមាន៤វិញ្ញាសា។វិញ្ញាសារត់ចម្ងាយ២១គីឡូម៉ែត្រមានអត្តពលិកចូលរួម៤០០០នាក់ វិញ្ញាសារត់១០គីឡូម៉ែត្រមាន៨០០០នាក់វិញ្ញាសារត់ចម្ងាយ៥គីឡូម៉ែត្រមាន៣៧០០នាន់និងវិញ្ញាសារត់ចម្ងាយ៣គីឡូម៉ែត្រមាន២៥០នាក់៕
