យុវជន ជិន ពុទ្ធិសាល សិស្សថ្នាក់ទី 9B2 នៃវិទ្យាល័យព្រះស៊ីសុវត្ថិ ប្រាប់ថា បានយល់ដឹងពីគុណតម្លៃនៃកីឡាកាន់តែខ្លាំងជាងមុន ក្រោយបានចូលរួមវគ្គអប់រំគុណតម្លៃអូឡាំពិក និងប្រវត្តិចលនាអូឡាំពិក ដែលមានការចែករំលែកដោយគណៈកម្មាធិការជាតិអូឡាំពិកកម្ពុជា កាលពីព្រឹកថ្ងៃព្រហស្បតិ៍ ទី១១ ខែធ្នូ ឆ្នាំ២០២៥ នៅសាលប្រជុំវិទ្យាល័យព្រះស៊ីសុវត្ថិ ដោយមានការចូលរួមពីសិស្សានុសិស្សជាង២០០នាក់។
ប្រធានថ្នាក់ដដែលសង្កត់ធ្ងន់ថា ការយល់ដឹងពីគុណតម្លៃនៃកីឡាធ្វើឱ្យគេមានភាពក្លាហានក្នុងការប្រកួតប្រជែងមិនបោះបង់ ហើយវាក៏អាចត្រូវបានប្រើប្រាស់ក្នុងជីវិតរស់នៅប្រចាំថ្ងៃបានផងដែរ ពោលឱ្យមនុស្សគ្រប់រូបចេះប្រឹងប្រែងតស៊ូ មិនចុះចាញ់។ ជាក់ស្ដែង យុវជនដដែល និងមិត្តរួមថ្នាក់ឯទៀតបានសហការសាមគ្គីគ្នាបានល្អ និងទទួលបានជ័យជម្នះក្នុងវគ្គលេងកីឡាទាញព្រ័ត្រជាមួយគ្នា។
យុវជន ជិន ពុទ្ធិសាល បានលើកទឹកចិត្តដល់មហាជន ជាពិសេសយុវជនដូចគ្នាត្រូវឆ្លៀតលេងកីឡាយ៉ាងតិចមួយមុខដើម្បីទទួលបានសុខភាពល្អ។ ទន្ទឹមនឹងនេះ គេក៏ផ្ដាំផ្ញើដល់យុវជនដូចគ្នាប្រឹងប្រែងរៀនសូត្រ និងលេងកីឡាពេលទំនេរ មិនត្រូវយកពេលទៅធ្វើអ្វីដែលប៉ះពាល់ដល់ខ្លួនឯង គ្រួសារ និងសង្គមជាតិឡើយ។
ឆ្លៀតក្នុងឱកាសនោះដែរ លោក ឆែម អាន គ្រូកីឡាប្រចាំវិទ្យាល័យព្រះស៊ីសុវត្ថិបានលើកទឹកចិត្តដល់សិស្សានុសិស្សខ្លួនឆ្លៀតពេលលេងកីឡាឱ្យបានច្រើនដើម្បីចៀសពីការចំណាយពេលទៅលើសកម្មភាពមិនល្អ។ ទន្ទឹមនឹងនេះការលេងកីឡាអាចផ្ដល់សុខភាពល្អដល់សិស្សានុសិស្ស ហើយអាចជ្រើសរើសបានធនធានល្អៗប្រកួតតទល់សាលាផ្សេងថែមទៀត។
