ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងជាអគ្គលេខាធិការសហព័ន្ធកីឡាការ៉ាតេកម្ពុជាតំណាងឯកឧត្ដមអគ្គបណ្ឌិតសភាចារ្យ អូន ព័ន្ធមុនីរ័ត្ន ប្រធានសហព័ន្ធ បានដឹកនាំមន្ត្រី និងកីឡាករ កីឡាការិនី ទៅគោរពវិញ្ញានក្ខន្ធ និងបាននាំយកអំណោយក៏ដូចជាថវិការបស់ឯកឧត្ដមប្រធានសហព័ន្ធចំនួន១០លានរៀលជូនដល់គ្រួសារនៃសពវីរៈកងទ័ព ប៊ុង តុងធៀន នៅព្រឹកថ្ងៃចន្ទ ទី២២ ខែធ្នូ នេះក្នុងខេត្តបាត់ដំបង។
ក្រុមគ្រួសារកីឡាការ៉ាតេទាំងអស់បានថ្លែងអំណរគុណដល់ឯកឧត្ដមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី និងជាប្រធានសហព័ន្ធកីឡាការ៉ាតេកម្ពុជាដែលតែងតែយកចិត្តទុកដាក់ និងឧបត្ថម្ភគាំទ្រដល់កីឡាការ៉ាតេ ជាពិសេស ដល់វីរៈកងទ័ព ប៊ុង តុងធៀន ជាកីឡាករការ៉ាតេម្នាក់ដែលបានពលីជីវិតដើម្បីការពារបូរណភាពទឹកដី។
ឯកឧត្ដម វ៉ាត់ ចំរើន ក្នុងនាមជា អគ្គលេខាធិការ សហព័ន្ធ បានមានប្រសាសន៍ថា សហព័ន្ធកីឡាការ៉ាតេកម្ពុជា និង កីឡាករ កីឡាការិនីទាំងអស់នឹងរចនារូបភាពតំណាង វីរៈកីឡាករ និងជា វីរៈកងទ័ព ប៊ុង តុងធៀន ទុកនៅតាមក្លិបនានាដើម្បីគោរពជាប្រចាំ ក្នុងន័យរំឭកដល់គុណូបការៈ។ ឯកឧត្ដម វ៉ាត់ ចំរើន ក៏បានបួងសួងដល់ វិញ្ញានក្ខន្ធ វីរៈកងទ័ព ប៊ុង តុងធៀន បានទៅកាន់សុគតិភព និងក្រុមគ្រួសារបានជួបតែសេចក្ដីសុខសុភមង្គល៕
