កុមារា កុមារី និងមាតាបិតាជាង១០០០នាក់បានចូលរួមទិវាកីឡាកម្សាន្ដសម្រាប់កុមារដែលបានប្រព្រឹត្តទៅរយៈពេល២ថ្ងៃ គឺនៅថ្ងៃទី៣០ និងថ្ងៃទី៣១ ខែឧសភា ឆ្នាំ២០២៦ នាបរិវេណទីលានកីឡានៃសាលាអន្តរជាតិ Herrington។
កុមារា កុមារី ទាំងអស់បានប្រកួតប្រជែងគ្នាលើប្រភេទកីឡាចំនួន៦ គឺកីឡា បាល់ទាត់ បាល់បោះ វាយសី វាយកូនហ្គោល កីឡារត់ និង កីឡាប្រជ្ញាអូឡាំពិក។
ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា មានប្រសាសន៍ថា នេះជាជំហានទី១ក្នុងការចូលរួមផ្សព្វផ្សាយចលនាអូឡាំពិក និង បំផុសសកម្មភាពកីឡាចាប់តាំងពីកុមារតូចៗឡើងទៅ។ មិនតែប៉ុណ្ណោះនេះក៏ជាការបញ្ជ្រាបសកម្មភាពកីឡាបន្ថែមក្នុងវិស័យអប់រំដល់សិស្សានុសិស្សពីលើការបណ្ដុះបណ្ដាលនូវចំណេះដឹង និងស្មារតី។ ឯកឧត្ដមរដ្ឋលេខាធិការសង្កត់ធ្ងន់ថា ការអប់រំកាយ និងកីឡា គឺជាមូលដ្ឋានដ៏សំខាន់មួយជួយឱ្យសិស្សានុសិស្សមានសុខភាពល្អ និង ស្ថិរភាពក្នុងការសិក្សា។
ផ្ដើមចេញពីសាលាអន្តរជាតិ Herrington ទៅ ឯកឧត្ដម វ៉ាត់ ចំរើន មានប្រសាសន៍ថា នេះជាគំរូមួយដល់គ្រឹះស្ថានអប់រំដទៃទៀត ចូលរួមបំផុសកាន់តែច្រើនដល់សកម្មភាពកីឡាដែលប្រកបដោយភាពស្តង់ដារ ហើយចាប់ផ្ដើមការលេងកីឡាលក្ខណៈសុខភាពបែបនេះ កុមារទាំងអស់ក៏នឹងអាចដុះគំនិតឈានទៅលេងកីឡាជំនាញដើម្បីក្លាយជាធនធានឆ្នើមសម្រាប់ជាតិនាពេលអនាគត។
ឯកឧត្ដម វ៉ាត់ ចំរើន បន្ថែមថា គ្រប់ប្រភេទកីឡាទាំងអស់ដែលត្រូវបានឱ្យកុមារលេងកម្សាន្ដនេះសុទ្ធតែបង្កើនបញ្ញា និងភាពវាងវៃដល់កុមារ។
ចំណែកលោក Kevin Hieng តំណាងសាលាអន្តរជាតិ Herrington ថ្លែងថា កីឡាគឺជាផ្នែកដ៏ធំមួយនៅសាលរៀនរបស់លោក បន្ថែមលើការសិក្សាអប់រំ។ ជាក់ស្ដែង នៅពេលសិស្សានុសិស្សមានសុខភាពល្អរឹងមាំ នោះពួកគេក៏អាចសិក្សាស្រូបចំណេះវិជ្ជាបានយ៉ាងរលូន៕
