អ្នកប្រដាល់សញ្ជាតិអង់ហ្គោឡា Dezon Sapalo អះអាងថា ឱកាសបានប៉ះកីឡាករប្រដាល់សកលឆ្នើមជម្រើសជាតិកម្ពុជា Anvar Nasredinov និង Rajapov Abdullah ពិតជាបានផ្ដល់បទពិសោធយ៉ាងសំខាន់ដើម្បីបង្កើនសមត្ថភាពរបស់ខ្លួន។
Sapalo ទទួលស្គាល់ថា Anvar និង Rajapov ពិតជាមានសមត្ថភាព និងបច្ចេកទេសល្អ។ ទន្ទឹមនឹងនេះ ការប្រកួតលើកទី២ដែលតតាំង Rajapov ពិតជាតានតឹងជាងពេលជួបជាមួយ Anvar ទៅទៀត។ ជាក់ស្ដែង គូប្រជែងជាជម្រើសជាតិកម្ពុជាមានជំនាញខ្លាំង និងកណ្ដាប់ដៃធ្ងន់។ គេក៏បានព្យាយាមអស់ពីសមត្ថភាពដែរ តែនៅតែមិនអាចគេចផុតពីលទ្ធផលបរាជ័យ។
ទោះបីយ៉ាងណា កីឡាករវ័យជាង២០ឆ្នាំសង្កត់ធ្ងន់ថា ចូលចិត្តការប្រកួតប្រជែងខ្លាំងបែបនេះ ជាពិសេសបានជួបអ្នកខ្លាំងៗដូចអ្នកទាំង២។ គេសង្ឃឹមថា ការប្រកួតក្រោយនឹងអាចធ្វើបានកាន់តែល្អ។
Sapalo បានបង្ហាញខ្លួនលើសង្វៀនកម្មវិធីប្រដាល់សកលប្រចាំខែ Dragon the Golden ២លើកហើយ ដោយចាញ់ពិន្ទុ Anvar Nasredinov ក្នុងខែឧសភា និងបន្តដោយលទ្ធផលដូចគ្នាពេលប៉ះ Rajapov Abdullah ចុងខែមិថុនា ថ្មីៗនេះ៕
