ភ្នំពេញ៖ ក្រុមកីឡាការ៉ាតេជម្រើសជាតិកម្ពុជា ទទួលបានសម្ភារៈ និងសម្លៀកបំពាក់ប្រកួតដែលមានស្តង់ដារខ្ពស់ ដើម្បីត្រៀមចូលរួមការប្រកួតកីឡាការ៉ាតេជើងឯកអាស៊ីអាគ្នេយ៍ លើកទី១៣ ដែលនឹងប្រព្រឹត្តទៅនៅក្រុង Ninh Binh ប្រទេសវៀតណាម ចាប់ពីថ្ងៃទី៩ ដល់ថ្ងៃទី១៣ ខែកក្កដា ឆ្នាំ២០២៦។
ក្នុងពិធីប្រគល់ និងទទួលសម្ភារៈ នាព្រឹកថ្ងៃទី៦ ខែកក្កដា ឆ្នាំ២០២៦ ឯកឧត្តម វ៉ាត់ ចំរើន អគ្គលេខាធិការសហព័ន្ធកីឡាការ៉ាតេកម្ពុជា បានមានប្រសាសន៍ថា សម្ភារៈទាំងនេះជាអំណោយឧបត្ថម្ភដោយផ្ទាល់ពីឯកឧត្តម អ៊ឹម សិទ្ធីរ៉ា ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានដោះស្រាយផលប៉ះពាល់ អនុប្រធានសហព័ន្ធកីឡាការ៉ាតេកម្ពុជា និងជាប្រធានក្លិបកីឡាការ៉ាតេក្រសួងសេដ្ឋកិច្ច និងហិរញ្ញវត្ថុ ដែលត្រូវបានប្រគល់ជូនតាមរយៈលោក អ៊ិច សុមុន្នី អគ្គលេខាធិការរងសហព័ន្ធ។
ឯកឧត្តម វ៉ាត់ ចំរើន បានបញ្ជាក់ថា ដោយយល់ឃើញពីតម្រូវការចាំបាច់របស់កីឡាករ កីឡាការិនីជម្រើសជាតិ ឯកឧត្តម អ៊ឹម សិទ្ធីរ៉ា បានប្រើប្រាស់ថវិកាផ្ទាល់ខ្លួន ដើម្បីទិញសម្ភារៈ និងសម្លៀកបំពាក់ដែលមានគុណភាព និងស្តង់ដារអន្តរជាតិ សម្រាប់គាំទ្រដល់ការហ្វឹកហាត់ និងការប្រកួត ដោយរំពឹងថានឹងរួមចំណែកលើកកម្ពស់សមត្ថភាព និងភាពជឿជាក់របស់ក្រុមជម្រើសជាតិ ក្នុងការដណ្ដើមលទ្ធផលល្អជូនប្រទេសជាតិ។
ក្នុងនាមសហព័ន្ធកីឡាការ៉ាតេកម្ពុជា ដែលមានឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជាប្រធានសហព័ន្ធ ឯកឧត្តម វ៉ាត់ ចំរើន បានថ្លែងអំណរគុណយ៉ាងជ្រាលជ្រៅចំពោះឯកឧត្តម អ៊ឹម សិទ្ធីរ៉ា ដែលបានផ្តល់ការគាំទ្រដ៏មានតម្លៃដល់ក្រុមជម្រើសជាតិកម្ពុជា និងជូនពរឱ្យឯកឧត្តម និងក្រុមគ្រួសារ ជួបប្រទះតែសេចក្តីសុខ សុខភាពល្អ និងជោគជ័យគ្រប់ភារកិច្ច។
សូមបញ្ជាក់ថា ក្រុមកីឡាការ៉ាតេជម្រើសជាតិកម្ពុជា បានត្រៀមខ្លួនរួចជាស្រេចសម្រាប់ការប្រកួតកីឡាការ៉ាតេជើងឯកអាស៊ីអាគ្នេយ៍ លើកទី១៣ នៅប្រទេសវៀតណាម ដោយរំពឹងថានឹងសម្រេចបានលទ្ធផលល្អ និងនាំយកកិត្តិយសជូនជាតិ៕
