ភ្នំពេញ៖ គណៈកម្មាធិការជាតិអូឡាំពិកកម្ពុជា (NOCC) បានរៀបចំវគ្គបណ្ដុះបណ្ដាលសាមគ្គីអូឡាំពិក ស្ដីពី រដ្ឋបាលកីឡា រយៈពេល ៤ថ្ងៃ ចាប់ពីថ្ងៃទី០៦ ដល់ថ្ងៃទី០៩ ខែកក្កដា ឆ្នាំ២០២៦ នៅខេត្តកំពង់ឆ្នាំង ដោយមានមន្ត្រីកីឡាចូលរួមចំនួន ២៥នាក់។ វគ្គបណ្ដុះបណ្ដាលនេះទទួលបានការគាំទ្រពីអង្គការសាមគ្គីអូឡាំពិក (Olympic Solidarity) សហការជាមួយគណៈកម្មាធិការជាតិអូឡាំពិកកម្ពុជា។
វគ្គបណ្ដុះបណ្ដាលនេះមានគោលបំណងពង្រឹងសមត្ថភាព និងបង្កើនចំណេះដឹងជូនមន្ត្រីកីឡាលើការគ្រប់គ្រង និងរដ្ឋបាលកីឡា ស្របតាមស្តង់ដារអន្តរជាតិ ដើម្បីរួមចំណែកលើកកម្ពស់ការអភិវឌ្ឍវិស័យកីឡានៅកម្ពុជា។
ក្នុងឱកាសនេះ សិក្ខាកាមបានទទួលការចែករំលែកចំណេះដឹងពីគ្រូឧទ្ទេសចំនួន ៥រូប ដែលមានបទពិសោធន៍ និងជំនាញខ្ពស់ក្នុងវិស័យកីឡា។ ឯកឧត្តម វ៉ាត់ ចំរើន បានធ្វើបទបង្ហាញអំពីអត្ថប្រយោជន៍ និងឥទ្ធិពលនៃកីឡា ព្រមទាំងការអភិវឌ្ឍកីឡាជំនាញ។ លោកវេជ្ជបណ្ឌិត សុខ សារឿន បានបង្ហាញពីវេជ្ជសាស្ត្រកីឡា ដោយផ្តោតលើការបង្ការ និងព្យាបាលរបួស ការផ្តល់អាហារូបត្ថម្ភ និងជំនាញសង្គ្រោះបឋម។
លោក ឯម ហៀង បានបង្ហាញអំពីរូបមន្ត និងប្រព័ន្ធរៀបចំការប្រកួតកីឡា ខណៈឯកឧត្តម ប៊ុយ សុភ័ណ្ឌ បានធ្វើបទបង្ហាញស្ដីពីរចនាសម្ព័ន្ធចលនាអូឡាំពិក និងតួនាទីកីឡាក្នុងសង្គម។ ចំណែកឯឯកឧត្តម ណយ ផាណា បានចែករំលែកចំណេះដឹងអំពីការរៀបចំផែនការប្រតិភូកីឡា គោលការណ៍ Fair Play និងការស្វែងរក និងអភិវឌ្ឍអត្តពលិកដែលមានទេពកោសល្យ។
គួរបញ្ជាក់ថា នៅព្រឹកថ្ងៃទី០៩ ខែកក្កដា ឆ្នាំ២០២៦ ឯកឧត្តម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការគណៈកម្មាធិការជាតិអូឡាំពិកកម្ពុជា នឹងអញ្ជើញជាអធិបតីក្នុងពិធីបិទវគ្គបណ្ដុះបណ្ដាល និងប្រគល់វិញ្ញាបនបត្រជូនមន្ត្រីកីឡាទាំង ២៥នាក់ ដែលបានបញ្ចប់វគ្គសិក្សាដោយជោគជ័យ។
