ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានចូលរួមកិច្ចប្រជុំក្រុមប្រឹក្សាប្រតិបត្តិលើកទី១ នៃព្រឹត្តិការណ៍កីឡាយុវជនអាស៊ីអាគ្នេយ៍បូក ឆ្នាំ២០២៧ ឬ Southeast Asian Plus Youth Games 2027 ដែលកំពុងប្រព្រឹត្តទៅនៅប្រទេសហ្វីលីពីន។
កិច្ចប្រជុំនេះបានប្រមូលផ្តុំថ្នាក់ដឹកនាំ និងមន្ត្រីកីឡាសំខាន់ៗមកពីបណ្តាប្រទេសនានានៅទូទាំងតំបន់អាស៊ី ដើម្បីពិភាក្សា និងរៀបចំផែនការសម្រាប់ការប្រកួតកីឡាយុវជនថ្នាក់តំបន់ជាប្រវត្តិសាស្ត្រលើកដំបូង ដែលគ្រោងនឹងធ្វើឡើងចាប់ពីថ្ងៃទី២ ដល់ថ្ងៃទី១៤ ខែធ្នូ ឆ្នាំ២០២៧ នៅប្រទេសហ្វីលីពីន។
ព្រឹត្តិការណ៍កីឡាយុវជនអាស៊ីអាគ្នេយ៍បូក ឆ្នាំ២០២៧ ត្រូវបានផ្តួចផ្តើមឡើងដោយលោក Abraham “Bambol” Tolentino ប្រធានគណៈកម្មាធិការអូឡាំពិកហ្វីលីពីន និងជាប្រធានស្ថាបនិកនៃព្រឹត្តិការណ៍នេះ ក្នុងគោលបំណងបង្កើតវេទិកាអភិវឌ្ឍន៍កីឡាករ កីឡាការិនីវ័យក្មេង ដែលមានអាយុចាប់ពី ១៦ឆ្នាំចុះក្រោម។
ព្រឹត្តិការណ៍នេះមិនត្រឹមតែមានការចូលរួមពីបណ្តាប្រទេសក្នុងតំបន់អាស៊ីអាគ្នេយ៍ប៉ុណ្ណោះទេ ប៉ុន្តែថែមទាំងអញ្ជើញកីឡាករ កីឡាការិនីវ័យក្មេងឆ្នើមមកពីបណ្តាប្រទេស “បូក” ក្នុងអនុតំបន់ផ្សេងៗនៃទ្វីបអាស៊ីផងដែរ។
តាមរយៈទម្រង់នៃការប្រកួតនេះ កីឡាករ កីឡាការិនីវ័យក្មេងនឹងទទួលបានបទពិសោធន៍ប្រកួតកម្រិតអន្តរជាតិ និងឱកាសបង្កើនសមត្ថភាព ដើម្បីត្រៀមខ្លួនចូលរួមព្រឹត្តិការណ៍កីឡាយុវជនអាស៊ី និងកីឡាអូឡាំពិកយុវជននាពេលអនាគត។
ការចូលរួមរបស់ឯកឧត្តម វ៉ាត់ ចំរើន ក្នុងកិច្ចប្រជុំនេះ បង្ហាញពីការចូលរួមយ៉ាងសកម្មរបស់កម្ពុជា ក្នុងការជំរុញការអភិវឌ្ឍកីឡាយុវជន ការពង្រឹងកិច្ចសហប្រតិបត្តិការកីឡាក្នុងតំបន់ និងការផ្តល់ឱកាសដល់កីឡាករ កីឡាការិនីវ័យក្មេងកម្ពុជា ឱ្យទទួលបានបទពិសោធន៍នៅលើឆាកអន្តរជាតិ។
