ថ្ងៃទី១៣ ខែកក្កដា ឆ្នាំ២០២៦ រាជធានីភ្នំពេញ – គណៈកម្មាធិការជាតិអូឡាំពិកកម្ពុជា (NOCC) បានសហការជាមួយមជ្ឈមណ្ឌលសិក្សាអូឡាំពិក “Olympic Study Center” របស់គណៈកម្មាធិការអូឡាំពិកអន្តរជាតិ (IOC) ដែលមានមូលដ្ឋាននៅទីក្រុងឡូសាន ប្រទេសស្វីស ដាក់បញ្ចូលបណ្ណាល័យអូឡាំពិកពិភពលោក (Olympic World Library) ទៅក្នុងគេហទំព័រផ្លូវការរបស់គណៈកម្មាធិការជាតិអូឡាំពិកកម្ពុជា៖ https://olympiccambodia.com។
បណ្ណាល័យអូឡាំពិកពិភពលោក គឺជាវេទិកាអប់រំ និងស្រាវជ្រាវដ៏សំខាន់មួយ ដែលផ្ដល់លទ្ធភាពឱ្យអ្នកប្រើប្រាស់អាចចូលមើលឯកសារ និងធនធានជាច្រើនពាក់ព័ន្ធនឹងអូឡាំពិក រួមមាន៖ ការបោះពុម្ពផ្សាយ ឯកសារស្រាវជ្រាវបែបសិក្សា ឯកសារប្រវត្តិសាស្ត្រ របាយការណ៍ផ្លូវការ និងប្រភពចំណេះដឹងនានាដែលទាក់ទងនឹងចលនាអូឡាំពិក។
ការដាក់បញ្ចូលបណ្ណាល័យអូឡាំពិកពិភពលោកទៅក្នុងគេហទំព័ររបស់គណៈកម្មាធិការជាតិអូឡាំពិកកម្ពុជា នឹងជួយឱ្យអត្តពលិក សហព័ន្ធកីឡាជាតិ និស្សិត អ្នកស្រាវជ្រាវ គ្រូបង្វឹក មន្ត្រីកីឡា អ្នកអប់រំ និងសាធារណជនកម្ពុជា អាចទទួលបានព័ត៌មាន និងធនធានអប់រំអូឡាំពិកដែលមានភាពជឿទុកចិត្តបាន កាន់តែងាយស្រួល។
គំនិតផ្ដួចផ្ដើមនេះ គឺជាផ្នែកមួយនៃការអនុវត្តផែនការយុទ្ធសាស្ត្រអាណត្តិទី៩ សម្រាប់ឆ្នាំ២០២៦-២០៣០ របស់ NOCC ក្នុងការលើកកម្ពស់ការអប់រំអូឡាំពិក ពង្រឹងការយល់ដឹងអំពីគុណតម្លៃអូឡាំពិក និងជំរុញការសិក្សា និងការស្រាវជ្រាវនៅក្នុងចលនាអូឡាំពិកកម្ពុជា។ គំនិតផ្ដួចផ្ដើមនេះក៏នឹងរួមចំណែកដល់ការផ្សព្វផ្សាយចំណេះដឹងឱ្យបានកាន់តែទូលំទូលាយ ពាក់ព័ន្ធនឹងទស្សនវិជ្ជាអូឡាំពិក ប្រវត្តិសាស្ត្រអូឡាំពិក ការអភិវឌ្ឍកីឡា អភិបាលកិច្ច ការអប់រំអត្តពលិក និងសកម្មភាពនានារបស់ចលនាអូឡាំពិក។
តាមរយៈកិច្ចសហការនេះ NOCC មានគោលបំណងពង្រីកលទ្ធភាពទទួលបានចំណេះដឹង ស្តីពីអូឡាំពិកដែលមានប្រភពច្បាស់លាស់ និងគួរឱ្យទុកចិត្ត ព្រមទាំងបង្កើតឱកាសបន្ថែមសម្រាប់ភាគីពាក់ព័ន្ធក្នុងវិស័យកីឡាកម្ពុជា និងសាធារណជន ឱ្យបានសិក្សាស្វែងយល់អំពីចលនាអូឡាំពិក និងគុណតម្លៃរបស់ចលនាអូឡាំពិក។
