ម្ចាស់ផ្ទះព្រឹត្តិការណ៍កីឡាអាស៊ីអាគ្នេយ៍ ឆ្នាំ ២០២៧ ម៉ាឡេស៊ី (SEA Games 2027) បានសម្រេចកំណត់យកកីឡាចំនួន៤៣ប្រភេទសម្រាប់ប្រកួតប្រជែង។ នេះបើតាមប្រសាសន៍ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាក្នុងឱកាសចូលរួមកិច្ចប្រជុំក្រុមប្រឹក្សាកីឡាអាស៊ីអាគ្នេយ៍ នៅប្រទេសម៉ាឡេស៊ី សប្ដាហ៍នេះ។
ឯកឧត្ដមអគ្គលេខាធិការបង្ហើបដែរថា កម្ពុជានឹងចូលរួមប្រកួតប្រជែងលើ៣១ប្រភេទកីឡា ហើយនឹងរៀបចំត្រៀមលក្ខណៈឱ្យបានល្អ។
កិច្ចប្រជុំកំពូលនេះក៏មានការចូលរួមពីគណៈកម្មការស្ត្រី និងកីឡា គណៈកម្មការវិជ្ជសាស្រ្ត គណៈកម្មការដូពីង គណៈកម្មការបទបញ្ញត្តិកីឡា និងគណៈម្មការដោះស្រាយវិវាទ។ គណៈកម្មការទាំងអស់បានពិនិត្យលើបញ្ហាដែលត្រូវដោះស្រាយ និងត្រៀមលក្ខណៈសម្រាប់ឆ្នាំ២០២៧។
ក្នុងនោះដែរ អ្វីដែលក្រុមប្រឹក្សាកីឡាអាស៊ីអាគ្នេយ៍ផ្ដោតយកចិត្តទុកដាក់គឺលើការពង្រឹង និងគោរពសមភាពយេនឌ័រ ដោយជំរុញឱ្យមានការការពារចំពោះការបៀតបៀនផ្លូវភេទ និងការការពារចំពោះកីឡាការិនី និងគ្រូបង្វឹកជាស្ត្រី។ អ្នកបង្កសកម្មភាពល្មើសណាមួយនឹងទទួលរងទណ្ឌកម្មទៅតាមការកំណត់របស់ចលនាអូឡាំពិក។
ជុំវិញការទិញសិទ្ធិទូរទស្សន៍ដោយប្រទេសជាសមាជិក គឺម្ចាស់ផ្ទះម៉ាឡេស៊ីបានដាក់កំហិតឱ្យមានការបង់លុយចំនួន២ម៉ឺនដុល្លារក្នុងមួយស្ថានីយ។ នេះជាចំណុចដែលសមាជិកអង្គប្រជុំបានឯកភាពគ្នាទាំងស្រុង។
ឯកឧត្ដម វ៉ាត់ ចំរើន បន្ថែមថា ក្រោយចប់កិច្ចប្រជុំដ៏ជោគជ័យនៅថ្ងៃសុក្រ ទី១៧ ខែកក្កដា ប្រតិភូពីសមាជិកអង្គប្រជុំទាំងអស់នឹងយកទៅផ្សព្វផ្សាយបន្តនៅប្រទេសខ្លួនដើម្បីត្រៀមលក្ខណៈទាំងបច្ចេកទេស និងហិរញ្ញវត្ថុសម្រាប់ការចូលរួមប្រកួតប្រជែងក្នុងឆ្នាំ ២០២៧៕
