ក្រោយបញ្ចប់ការបំពេញបេសកកម្មរយៈពេល៣ថ្ងៃនៅកម្ពុជា លោក យ៉ុង ជូលាវ អ្នកជំនាញកីឡាលើកទម្ងន់មកពីសហព័ន្ធកីឡាលើកទម្ងន់អន្តរជាតិ ថ្លែងថា ទោះបីស្ថានភាពកីឡាលើកទម្ងន់នៅកម្ពុជាកំពុងស្ថិតក្នុងដំណាក់កាលកំពុងអភិវឌ្ឍ ប៉ុន្តែលោកជឿជាក់ថា នឹងមានអនាគតល្អ ដោយសារតែការខិតខំប្រឹងប្រែងពីសហព័ន្ធជាតិ បូករួមទាំងគុណភាពគ្រូបង្វឹក និងអត្តពលិក។ ដូច្នេះការខិតខំប្រឹងប្រែងបន្ថែមទៀតពីក្រុមការងារគ្រូបង្វឹក នឹងអាចធ្វើឱ្យក្រុមអត្តពលិកកាន់តែប្រសើរទៅមុខមួយកម្រិតទៀត។
ទន្ទឹមនឹងនេះ អ្នកជំនាញដដែលក៏បានចែករំលែកនូវមតិយោបល់មួយចំនួនទៅកាន់សហព័ន្ធកីឡាលើកទម្ងន់កម្ពុជា ទាក់ទងទៅនឹងការរៀបចំផែនការឱ្យបានល្អ ជាពិសេសផែនការរយៈពេលវែង និងស្វែងរកការឧបត្ថម្ភគាំទ្រលើផ្នែកហិរញ្ញវត្ថុពីមជ្ឈដ្ឋាននានា។ មិនតែប៉ុណ្ណោះ សម្ភារៈហ្វឹកហាត់ពិតជាតម្រូវការបន្ថែមយ៉ាងចាំបាច់ដើម្បីអភិវឌ្ឍសមត្ថភាពអត្តពលិក។
ចំណែកឯកឧត្ដម តែម ម៉ឺន ប្រធានសហព័ន្ធកីឡាលើកទម្ងន់កម្ពុជា បានចាត់ទុកដំណើរទស្សនកិច្ចរបស់លោក យ៉ុង ជូលាវ ពិតជាសំខាន់ ព្រោះសហព័ន្ធអាចទទួលបានការចែករំលែកបទពិសោធក្នុងន័យអភិវឌ្ឍកីឡាមួយនេះនៅកម្ពុជា ទាំងកិច្ចការរដ្ឋបាល ការគ្រប់គ្រង ការដោះស្រាយបញ្ញានានា ពោលដំណើរអភិវឌ្ឍន៍ប្រកបដោយស្តង់ដារ។
សូមជម្រាបជូនថា ដំណើរទស្សនកិច្ចរបស់លោក យ៉ុង ជូលាវ អ្នកជំនាញកីឡាលើកទម្ងន់ ធ្វើឡើងក្រោមការឧបត្ថម្ភជ្រោមជ្រែងពីសហព័ន្ធកីឡាលើកទម្ងន់អន្តរជាតិ និងគណៈកម្មាធិការជាតិអូឡាំពិកកម្ពុជា ក្នុងគម្រោងសាមគ្គីភាពអូឡាំពិកដើម្បីអភិវឌ្ឍគម្រោងប្រព័ន្ធកីឡាជាតិរបស់សហព័ន្ធកីឡាលើកទម្ងន់កម្ពុជា ដែលបានប្រព្រឹត្តទៅពីថ្ងៃទី១១ដល់ថ្ងៃទី១៣ ខែសីហា ឆ្នាំ២០២៥៕
