លោក យីវ វណ្ណឌី បានបង្ហាញអារម្មណ៍រីករាយយ៉ាងខ្លាំងដែលបានតំណាងកម្ពុជាក្នុងនាមជាអាជ្ញាកណ្ដាលអន្តរជាតិប្រភេទកីឡាតេក្វាន់ដូ WT ប្រចាំព្រឹត្តិការណ៍កីឡាយុវជនអាស៊ី ឆ្នាំ២០២៥ នៅប្រទេសបារ៉ែន។
នេះជាលើកទី៣ហើយដែលមន្ត្រីកីឡាតេក្វាន់ដូ WT កម្ពុជាខាងលើបានចូលរួមព្រឹត្តិការណ៍អ់ន្តរជាតិ ដោយលើកទី១ជាការប្រកួតលំដាប់ពិភពលោកនៅប្រទេសសិង្ហបុរី និងការប្រកួតអន្តរជាតិចំនួន២ដងទៀតនៅប្រទេសកូរ៉េខាងត្បូង ដែលមានកម្មវិធី Korean Open និងការប្រកួតតេក្វាន់ដូ WT សម្រាប់យោធា។
លោក យីវ វណ្ណឌី សង្កត់ធ្ងន់ថា នេះជាបទពិសោធដ៏ពិសេសមួយដែលលោកអាចរៀនសូត្របានថែមទៀត និងអាចចែករំលែកដល់អាជ្ញាកណ្ដាលកីឡាតេក្វាន់ដូ WT នៅកម្ពុជា។
បុរសមានប្រភពពីខេត្តព្រះសីហនុ រៀបរាប់បែបនេះ "៖ ការប្រកួតអន្តរជាតិបែបនេះធ្វើឱ្យយើងបានបទពិសោធថ្មី និងចំណេះដឹងថ្មី ដែលយើងអាចរៀនសូត្រ យកទៅចែករំលែកដល់កីឡាករ កីឡាការិនី ដើម្បីអភិវឌ្ឍកីឡាតេក្វាន់ដូ WT នៅប្រទេសយើង។"
លោក យីវ វណ្ណឌី បានផ្ដើមការហ្វឹកហាត់កីឡាតេក្វាន់ដូ WT ក្នុងឆ្នាំ២០០០ ហើយក្រោយឈប់ពីការប្រកួត លោកបានធ្វើជាគ្រូបង្វឹក និងរៀនសូត្រធ្វើជាអាជ្ញាកណ្ដាល ព្រោះមើលឃើញថា ធនធានអាជ្ញាកណ្ដាលតេក្វាន់ដូ WT នៅកម្ពុជា មិនសូវសម្បូរនៅឡើយ៕
