សហព័ន្ធកីឡាវ៉ូវីណាមកម្ពុជា បានប្រកាសជាផ្លូវការថា កម្ពុជានឹងធ្វើជាម្ចាស់ផ្ទះរៀបចំ «ព្រឹត្តិការណ៍កីឡាវ៉ូវីណាមជើងឯកអាស៊ី ឆ្នាំ២០២៦» ចាប់ពីថ្ងៃទី២៤ ដល់ថ្ងៃទី៣០ ខែវិច្ឆិកា ឆ្នាំ២០២៦ ខាងមុខនេះ នាវិមានពហុកីឡដ្ឋានជាតិ (អូឡាំពិក) ដោយមានអត្តពលិកជិត ៣០០ នាក់ មកពី ១៥ ប្រទេស ចូលរួមប្រកួតប្រជែង។
ការប្រកាសនេះត្រូវបានធ្វើឡើងដោយ ឯកឧត្ដម អ៊ូ រតនា ប្រធានសហព័ន្ធកីឡាវ៉ូវីណាមកម្ពុជា ក្នុងឱកាសជួបសំណេះសំណាល ផ្តល់អនុសាសន៍ដល់កីឡាករ-កីឡាការិនី និងទទួលការឧបត្ថម្ភឯកសណ្ឋានពីក្រុមហ៊ុន NT។
ក្នុងពិធីដ៏មានអត្ថន័យនេះ ឯកឧត្ដមប្រធានសហព័ន្ធ បានផ្ដាំផ្ញើ និងលើកទឹកចិត្តដល់ក្រុមជម្រើសជាតិកម្ពុជាទាំងអស់ ឱ្យប្រកួតដោយស្មារតី Fair Play (ការប្រកួតដោយយុត្តិធម៌) រក្សាមិត្តភាព និងសាមគ្គីភាព ជាពិសេសគឺការប្ដេជ្ញាចិត្តប្រឹងប្រែងឱ្យអស់ពីសមត្ថភាពដើម្បីដណ្ដើមមេដាយជូនជាតិមាតុភូមិ។
បន្ថែមពីនេះ ឯកឧត្ដម អ៊ូ រតនា បានគូសបញ្ជាក់យ៉ាងម៉ឹងម៉ាត់អំពីវិន័យ និងការគោរពបទបញ្ជាការប្រកួតដោយត្រូវគោរពតាមការសម្រេចរបស់ចៅក្រម-អាជ្ញាកណ្ដាលដាច់ខាត ដោយមិនត្រូវធ្វើជាអ្នកប្រកួតផង និងជាអ្នកកាត់សេចក្ដីដោយខ្លួនឯងនោះទេ។ ក្នុងនាមជាអត្តពលិកម្ចាស់ផ្ទះ ត្រូវបង្ហាញភាពរួសរាយ រាក់ទាក់ ទន់ភ្លន់ និងជួយផ្សព្វផ្សាយតំបន់ទេសចរណ៍ជាតិដល់ប្រតិភូ និងអត្តពលិកបរទេស។ បង្ហាញគំរូល្អទាំងលើទីលានប្រកួត និងការថែរក្សាអនាម័យបរិស្ថាន។
សហព័ន្ធកីឡាវ៉ូវីណាមកម្ពុជា បានប្តេជ្ញាចិត្តយ៉ាងមុតមាំក្នុងការខិតខំប្រឹងប្រែងដណ្តើមមេដាយជូនជាតិ ដើម្បីឆ្លើយតបទៅនឹងទំនុកចិត្ត និងការអនុញ្ញាតដ៏ខ្ពង់ខ្ពស់ពីរាជរដ្ឋាភិបាលកម្ពុជា ដែលបានផ្តល់ឱកាសឱ្យសហព័ន្ធធ្វើជាម្ចាស់ផ្ទះរៀបចំព្រឹត្តិការណ៍កម្រិតតំបន់អាស៊ីមួយនេះ៕
