កិច្ចសហប្រតិបត្តិការរយៈពេល ៤ឆ្នាំ រវាងក្រុមហ៊ុនធានារ៉ាប់រង AIA Cambodia និងគណៈកម្មាធិការជាតិអូឡាំពិកកម្ពុជា (NOCC) បាននិងកំពុងដើរតួនាទីយ៉ាងសំខាន់ក្នុងការលើកកម្ពស់ការយល់ដឹង និងការទប់ស្កាត់ជំងឺមហារីកសុដន់ក្នុងចំណោមស្ត្រីកម្ពុជា ពីមួយឆ្នាំទៅមួយឆ្នាំ។
លោកស្រី ខៀវ វរៈច័ន្ទ នាយិការផ្នែកទីផ្សារនៃក្រុមហ៊ុន AIA Cambodia បានគូសបញ្ជាក់ថា ភាពជាដៃគូជាមួយ NOCC បានធ្វើឱ្យយុទ្ធនាការការយល់ដឹងអំពីជំងឺមហារីកសុដន់រីកធំធាត់យ៉ាងឆាប់រហ័ស។ ជាក់ស្តែង កាលពីឆ្នាំ២០១៧ ដែលជាឆ្នាំដំបូងនៃយុទ្ធនាការ និងរៀបចំដោយ AIA តែឯង មានស្ត្រីត្រឹមតែជាង ១០០នាក់ប៉ុណ្ណោះដែលបានចូលរួមពិនិត្យសុខភាព។ ប៉ុន្តែបន្ទាប់ពីចាប់ដៃគូរៀបចំ «ព្រឹត្តិការណ៍រត់ប្រណាំង AIA Pink Run» ចាប់តាំងពីឆ្នាំ២០២៣មក ចំនួនស្ត្រីដែលមកទទួលការពិនិត្យ និងប្រឹក្សាយោបល់ឥតគិតថ្លៃបានកើនឡើងរហូតដល់ប្រមាណ ៥.០០០នាក់ កាលពីឆ្នាំ២០២៥ កន្លងទៅ។ លោកស្រីបានសង្កត់ធ្ងន់ថា AIA និង NOCC នឹងបន្តបេសកកម្មមនុស្សធម៌នេះរួមគ្នារហូតដល់ឆ្នាំ២០២៨។
ចំពោះព្រឹត្តិការណ៍រត់ប្រណាំង AIA Pink Run ឆ្នាំ២០២៦ នឹងប្រព្រឹត្តទៅនាថ្ងៃអាទិត្យ ទី២៦ ខែតុលា ឆ្នាំ២០២៦ ខាងមុខនេះ នៅបរិវេណសួនច្បារមុខវត្តបទុមវតី។
ទាក់ទិននឹងការរៀបចំនេះដែរ លោក សែម ផល្លា នាយកចាត់ការទូទៅព្រឹត្តិការណ៍ម៉ារ៉ាតុងនៅកម្ពុជា បានឱ្យដឹងថា គិតត្រឹមពេលនេះមានអ្នកចុះឈ្មោះចូលរួមជាង ២.០០០នាក់មកពី ២៧ប្រទេសផ្សេងៗគ្នា។ ក្នុងនោះ៖
វិញ្ញាសា ១០គីឡូម៉ែត្រ: មានអ្នកចុះឈ្មោះ ១.២៤៣នាក់
វិញ្ញាសា ៥គីឡូម៉ែត្រ: មានជាង ៥០០នាក់
វិញ្ញាសា ២,៥គីឡូម៉ែត្រ: មានជិត ៣០០នាក់
លោកបានសម្តែងក្តីរំពឹងថា ចំនួនអ្នកចូលរួមសរុបអាចនឹងកើនឡើងចន្លោះពី ៤.០០០ ទៅ ៥.០០០នាក់ នៅថ្ងៃព្រឹត្តិការណ៍ផ្ទាល់។
ជាមួយគ្នានេះដែរ ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានមានប្រសាសន៍ថា ការរីកចម្រើននៃព្រឹត្តិការណ៍រត់ប្រណាំងនេះពីមួយឆ្នាំទៅមួយឆ្នាំ បានស្តែងឱ្យឃើញពីផលវិជ្ជមានយ៉ាងខ្លាំង ជាពិសេសការភ្ញាក់រលឹក និងការយល់ដឹងកាន់តែស៊ីជម្រៅរបស់ស្ត្រីកម្ពុជាអំពីគ្រោះថ្នាក់នៃជំងឺមហារីកសុដន់។
ឯកឧត្ដមអគ្គលេខាធិការ ក៏បានអំពាវនាវយ៉ាងទទូចដល់សាធារណជន ជាពិសេសស្ត្រីកម្ពុជាទាំងអស់ ឱ្យចូលរួមក្នុងព្រឹត្តិការណ៍នេះឱ្យបានច្រើនកុះករ និងកុំភ្លេចអញ្ជើញមកទទួលសេវាពិនិត្យ និងប្រឹក្សាយោបល់ជំងឺមហារីកសុដន់ដោយឥតគិតថ្លៃ ដែលនឹងប្រព្រឹត្តទៅចាប់ពីថ្ងៃទី២៣ ដល់ថ្ងៃទី២៥ ខែតុលា ឆ្នាំ២០២៦ នៅសួនច្បារមុខវត្តបទុមវតី៕
