សិស្សានុសិស្សវិទ្យាល័យ ជាស៊ីម សាមគ្គី បានបង្ហាញមោទនភាពដែលបានចូលរួមកម្មវិធីផ្សព្វផ្សាយ និងអប់រំគុណតម្លៃអូឡាំពិកដែលរៀបចំដោយគណៈកម្មាធិការជាតិអូឡាំពិកកម្ពុជា នៅព្រឹកថ្ងៃពុធ ទី៤ ខែវិច្ឆិកា ឆ្នាំ២០២៦។
ជាក់ស្ដែង យុវតី ដូ ពេជ្របញ្ញាដាលីស ថ្លែងថា នេះជាលើកទី១ហើយដែលរូបនាងទទួលបានព័ត៌មាន ឬប្រវត្តិកីឡាអូឡាំពិក។ បន្ទាប់ពីទទួលបានចំណេះដឹងដ៏សំខាន់នេះ យុវសិស្ស ដាលីស កាន់តែយល់ដឹងពីការប្រកួតប្រជែងកីឡាដែលមិនមានការរើសអើង ហើយប្រកបដោយសាមគ្គីភាព និង មិត្តភាព។ ការលេងកីឡាក៏ជាចលករសំខាន់នាំមកនូវសន្តិភាព។ សិស្សថ្នាក់ទី១០B1 ដដែលបានលើកទឹកចិត្តដល់មហាជនទាំងក្មេង ទាំងចាស់ចូលរួមលេងកីឡាដើម្បីទទួលបានសុខភាពល្អ និង រាងកាយមាំមួន។
មិនខុសពីសិស្សានុសិស្សរបស់ខ្លួន លោក ផាន់ ណិល នាយកវិទ្យាល័យ ជាស៊ីម សាមគ្គី បានចាត់ទុកការផ្សព្វផ្សាយគុណតម្លៃអូឡាំពិកពីគណៈកម្មាធិការជាតិអូឡាំពិកកម្ពុជា ជាសកម្មភាពដ៏សំខាន់ដើម្បីឱ្យយុវជនកាន់តែយល់ដឹងពីគុណតម្លៃកីឡា និងសុខភាព ក៏ដូចជាអត្ថប្រយោជន៍នៃការលេងកីឡា។
សម្រាប់វិទ្យាល័យ ជាស៊ីម សាមគ្គី មានសកម្មភាពកីឡាយ៉ាងច្រើនទាំងបុរស និងនារី ហើយក៏បានចូលរួមការប្រកួតនានាយ៉ាងផុសផុលទាំងកម្រិតគ្រឹះស្ថានអប់រំ និងមហាជន។ ការចូលរួមប្រកួតប្រជែងកន្លងមក វិទ្យាល័យរបស់លោកក៏ទទួលបានចំណាត់ថ្នាក់ល្អជាហូរហែដែរ។
ជុំវិញកម្មវិធីដ៏ពិសេសនេះ លោក សោម សុទ្ធរិទ្ធិពង្ស គ្រូឧទ្ទេសប្រចាំកម្មវិធីថ្លែងថា គោលបំណងសំខាន់នៃការផ្សព្វផ្សាយ គឺដើម្បីបញ្ជ្រាបដល់សិស្សានុសិស្សឱ្យបានដឹងពីគុណតម្លៃអូឡាំពិកដែលមានតាំងពីសម័យក្រិកបុរាណជាង២៧០០ឆ្នាំមុន ហើយត្រូវបានយកមកបំផុសជាថ្មីទៀតនាសម័យបច្ចុប្បន្ន ដោយគណៈកម្មាធិការអូឡាំពិកអន្តរជាតិ និងគណៈកម្មាធិការជាតិអូឡាំពិកកម្ពុជា។
លោកវាគ្មិនដដែលសង្កត់ធ្ងន់ថា សិស្សានុសិស្សនឹងបានយល់ពីគុណតម្លៃទាំងអស់ដែលមានឧត្ដមភាព ការគោរព និង មិត្តភាព ដែលមិនត្រឹមតែប្រើប្រាស់ក្នុងកីឡាទេ តែក៏ជាគុណតម្លៃមួយដែលអាចឱ្យសិស្សានុសិស្សប្រើប្រាស់ក្នុងជីវភាពប្រចាំថ្ងៃ ហើយប្រជាជនទូទៅអាចប្រើប្រាស់បានដូចគ្នា។ ជាមួយគ្នានេះ អត្ថន័យនៃការប្រកួតកីឡាអូឡាំពិកក៏ត្រូវបានបញ្ជ្រាប មានទាំងអូឡាំពិករដូវក្ដៅ រដូវរងា និងអូឡាំពិកយុវជនដែលកម្ពុជាបានចូលរួមថ្មីៗនេះ។ ចំណុចសំខាន់មួយទៀត គឺការផ្សព្វផ្សាយការធ្វើជាម្ចាស់ផ្ទះព្រឹត្តិការណ៍កីឡាយុវជនអាស៊ី ឆ្នាំ២០៣១ ដែលគ្រោងមាន៤៥ប្រទេសចូលរួម៕
