សិក្ខាកាមចំនួន៣០រូបដែលចំនួន១៨រូប និងបុរស១២រូប បានបញ្ចប់វគ្គបណ្ដុះបណ្ដាលមន្ត្រីបច្ចេកទេសកីឡារាំដោយជោគជ័យ ក្រោយដំណើរការចាប់ពីថ្ងៃទី១ដល់ថ្ងៃទី៤ ខែវិច្ឆិកា ឆ្នាំ២០២៦។
លោកស្រី ហង់ ស៊ីមន អគ្គលេខាធិការសហព័ន្ធកីឡារាំកម្ពុជា ថ្លែងថា ឆ្លងកាត់ការសិក្សាអស់រយៈពេល៤ថ្ងៃ សិក្ខាកាមទាំងអស់ទទួលបានចំណេះដឹងជាច្រើនបន្ថែមទៀតដើម្បីអភិវឌ្ឍមន្ត្រីបច្ចេកទេសកីឡារាំ និងការគ្រប់គ្រងការប្រកួត ការដឹកនាំ និងការរៀបចំការប្រកួត ដោយផ្អែកលើការអនុវត្តវិទ្យាសាស្ត្រគ្រប់គ្រងទៅលើព្រឹត្តិការណ៍ប្រកួតកីឡា ដើម្បីធានាថា ការប្រកួតប្រព្រឹត្តទៅដោយសមធម៌ មានសុវត្ថិភាព តម្លាភាព និងស្របតាមស្តង់ដាអន្តរជាតិ។
វគ្គបណ្ដុះបណ្ដាលនេះក៏បែងចែកតួនាទី និងភារកិច្ចរបស់មន្ត្រីបច្ចេកទេសកីឡារាំ ក្រមសីលធម៌មន្ត្រីបច្ចេកទេស បទពិសោធល្អៗដល់សិក្ខាកាម ដើម្បីបង្កើនធនធានជាមន្ត្រីបច្ចេកទេសកីឡារាំឱ្យកាន់តែរីកចម្រើន។ ក្នុងនោះសិក្ខាកាមដែលទទួលនិទ្ទេសល្អមានចំនួន៨០ភាគរយ និងនិទ្ទេសមធ្យមមានចំនួន២០ភាគរយ។
លោកស្រីអគ្គលេខាធិការបន្តថា ការរៀបចំវគ្គបណ្ដុះបណ្ដាលនេះធ្វើឡើងក្នុងគោលបំណងបណ្ដុះធនធានមនុស្ស ក្នុងកម្រិតជំនាញមន្ត្រីបច្ចេកទេសកីឡារាំដល់មន្ត្រីកីឡា កីឡាករ កីឡាការិនីនៃសហព័ន្ធកីឡារាំកម្ពុជាដើម្បីអភិវឌ្ឍកីឡារាំឱ្យមានភាពរីកចម្រើនដូចបណ្ដាប្រទេសលើសកលលោក។
ជាមួយគ្នានេះ លោកជំទាវ ប៉ុក ណណ្ដា អនុប្រធានសហព័ន្ធកីឡារាំកម្ពុជាបានវាយតម្លៃខ្ពស់ចំពោះគណៈកម្មការ ដែលបានរៀបចំវគ្គបណ្ដាលមន្ត្រីបច្ចេកទេសកីឡារាំឱ្យប្រព្រឹត្តទៅដោយរលូនតាមការគ្រោងទុក ប្រកបដោយជោគជ័យ និងបរិយាកាសសប្បាយរីករាយ។
លោកជំទាវក៏បានកោតសរសើរចំពោះសិក្ខាកាមទាំងអស់ដែលបានខិតខំប្រឹងប្រែងយកចិត្តទុកដាក់អស់ពីសមត្ថភាពក្នុងការក្រេបជញ្ជក់នូវចំណេះដឹង ដោយទទួលបានលទ្ធផលល្អប្រសើរ។
សូមបញ្ជាក់ថា គ្រូឧទ្ទេសប្រចាំវគ្គបណ្ដុះបណ្ដាលមន្ត្រីបច្ចេកទេសកីឡារាំនេះមានចំនួន៤រូប រួមមានលោកជំទាវ ម៉ក់ វណ្ណស៊ីថា អនុប្រធាសហព័ន្ធ លោកស្រី ហង់ ស៊ីមន អគ្គលេខាធិការ លោកគ្រូ ស៊ូវ តុង នាយកបច្ចេកទេស និងកញ្ញា You Shu Jie ចៅក្រមអន្តរជាតិ និងជាគ្រូបង្វឹកជម្រើសជាតិ៕
