សហព័ន្ធកីឡាប្រដាល់សកលកម្ពុជា និង BRICS HOUSE CAMBODIA បានចុះអនុស្សរណៈនៃការយោគយល់គ្នា (MOU) ជាផ្លូវការលើភាពជាដៃគូអភិវឌ្ឍកីឡាប្រដាល់សកលអាជីព រយៈពេល ២ឆ្នាំ
នារសៀល ថ្ងៃទី១៦ ខែកញ្ញា ឆ្នាំ២០២៦។
ពិធីចុះហត្ថលេខានេះត្រូវបានធ្វើឡើងក្រោមអធិបតីភាព ឯកឧត្តម ប៊ុយ សុភ័ណ្ឌ ប្រធានសហព័ន្ធកីឡាប្រដាល់សកលកម្ពុជា និងលោក VLADIMIR PALANCICA ប្រធាន BRICS HOUSE CAMBODIA ដោយមានការចូលរួមពីសំណាក់ភ្ញៀវកិត្តិយស អត្តពលិក និងអ្នកសារព័ត៌មានយ៉ាងច្រើនកុះករ។
ឯកឧត្តម ប៊ុយ សុភ័ណ្ឌ បានថ្លែងថា កិច្ចសហប្រតិបត្តិការនេះគឺជាកាលានុវត្តភាពថ្មីមួយទៀតសម្រាប់សហព័ន្ធក្នុងអាណត្តិទី៨ ក្នុងការកែទម្រង់ការប្រកួតប្រដាល់សកលអាជីពឱ្យស្របតាមបទប្បញ្ញត្តិ និងស្តង់ដាបច្ចេកទេសអន្តរជាតិ។ កន្លងមក សហព័ន្ធក៏បានសហការជាមួយក្រុមហ៊ុន វឌ្ឍនៈ គ្រុប រៀបចំកម្មវិធីប្រកួត “DRAGON | THE GOLDEN RING” រហូតទទួលបានការទទួលស្គាល់ជាផ្លូវការពីស្ថាប័ន BOXREC ដែលជាស្ថាប័នកត់ត្រា និងចាត់ថ្នាក់ប្រដាល់អាជីពដ៏ធំបំផុតលើពិភពលោក។
ឯកឧត្តមបានគូសបញ្ជាក់បន្ថែមថា ភាពជាដៃគូប្រវត្តិសាស្ត្រនេះនឹងផ្តល់ឱកាសដល់កីឡាករ កីឡាការិនីអាជីពក្នុងការបង្កើនសមត្ថភាព រកប្រាក់ចំណូល និងពង្រឹងគុណផលក្រុមជម្រើសជាតិ។ ទិសដៅធំរបស់សហព័ន្ធ គឺការនាំយកកីឡាប្រដាល់សកលកម្ពុជាត្រឡប់ទៅចូលរួមការប្រកួតកីឡាអូឡាំពិកសាជាថ្មី បន្ទាប់ពីធ្លាប់បានបង្កើតប្រវត្តិសាស្ត្រដ៏អស្ចារ្យកាលពីឆ្នាំ១៩៦៤ នៅទីក្រុងតូក្យូ ប្រទេសជប៉ុន។
ក្នុងឱកាសនោះ ឯកឧត្តមប្រធានសហព័ន្ធបានថ្លែងអំណរគុណយ៉ាងជ្រាលជ្រៅដល់លោក Vladimir Palancica ចំពោះការឧបត្ថម្ភគាំទ្រនាពេលកន្លងមក ព្រមទាំងបានអំពាវនាវដល់សាធារណជន ក្រុមហ៊ុនសប្បុរសជន និងបណ្តាញសារព័ត៌មានទូរទស្សន៍នានា ឱ្យបន្តចូលរួមគាំទ្រវិស័យប្រដាល់សកលកម្ពុជា ដើម្បីរួមគ្នាសំរេចចក្ខុវិស័យអូឡាំពិកនាពេលអនាគត។
