Nagoya, Japan៖ លោក ជឹម ធារ៉ា អគ្គលេខាធិការសហព័ន្ធកីឡាគុនចម្រុះកម្ពុជា និងកញ្ញា ខៃ ប៊ុណ្ណារី ត្រូវបាន គណៈកម្មាធិការរៀបចំការប្រកួតអាស៊ីហ្គេមលើកទី២០ ឆ្នាំ២០២៦ (AINAGOC) និង សមាគមកីឡាយុទ្ធគុនចម្រុះអាស៊ី (AMMA) អញ្ជើញឱ្យចូលរួមបំពេញការងារជា មន្ត្រីបច្ចេកទេសអន្តរជាតិ (International Technical Officials – ITOs) ក្នុងព្រឹត្តិការណ៍ 20th Aichi-Nagoya Asian Games 2026 នៅទីក្រុង Nagoya ប្រទេសជប៉ុន។
ការចូលរួមរបស់មន្ត្រីបច្ចេកទេសកម្ពុជាទាំង ២រូប គឺជាឱកាសដ៏មានតម្លៃសម្រាប់កម្ពុជាក្នុងការចូលរួមចំណែកក្នុងការរៀបចំ និងដំណើរការប្រកួតកីឡាដ៏ធំប្រចាំទ្វីបអាស៊ី ព្រមទាំងជាឱកាសសម្រាប់បង្ហាញពីសមត្ថភាព និងបទពិសោធន៍របស់មន្ត្រីកីឡាកម្ពុជានៅលើឆាកអន្តរជាតិ។
ជាមួយគ្នានេះ ការត្រូវបានអញ្ជើញឱ្យបំពេញតួនាទីជាមន្ត្រីបច្ចេកទេសអន្តរជាតិនៅក្នុងព្រឹត្តិការណ៍ដ៏ធំមួយនេះ ក៏ជាកិត្តិយស និងជាមោទកភាពមួយសម្រាប់វិស័យកីឡាគុនចម្រុះកម្ពុជា ព្រមទាំងជាឱកាសក្នុងការសិក្សារៀនសូត្រពីបទពិសោធន៍ និងស្តង់ដារបច្ចេកទេសអន្តរជាតិ។
លោក ជឹម ធារ៉ា បានចាត់ទុកការចូលរួមបំពេញការងារនៅប្រទេសជប៉ុននេះថា ជាឱកាសដ៏ពិសេសមួយសម្រាប់ទទួលបានចំណេះដឹង និងបទពិសោធន៍ថ្មីៗបន្ថែមទៀត ដែលអាចយកមកចែករំលែក និងអនុវត្តក្នុងការអភិវឌ្ឍវិស័យកីឡាគុនចម្រុះនៅកម្ពុជា ព្រមទាំងចូលរួមចំណែកក្នុងការត្រៀមរៀបចំព្រឹត្តិការណ៍កីឡាធំៗនានានាពេលអនាគត។
គួរបញ្ជាក់ថា កីឡាអាស៊ី (Asian Games) លើកទី២០ ឆ្នាំ២០២៦ នឹងប្រព្រឹត្តទៅនៅតំបន់ Aichi-Nagoya ប្រទេសជប៉ុន ចាប់ពីថ្ងៃទី ១៩ ខែកញ្ញា ដល់ថ្ងៃទី៤ ខែតុលា ឆ្នាំ២០២៦។
