ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) និងជានាយបេសកកម្មក្រុមកីឡាជម្រើសជាតិកម្ពុជា បានគូសបញ្ជាក់ថា ដំណើរការនៃការចូលរួមរបស់ប្រតិភូ និងអត្តពលិកកម្ពុជា ទាំងពិធីបើកផ្លូវការ និងការប្រកួតលើទីលាន គឺបានប្រព្រឹត្តទៅយ៉ាងរលូន និងជោគជ័យ។
ក្នុងបេសកកម្មប្រវត្តិសាស្ត្រនេះ គណៈប្រតិភូកម្ពុជា ទទួលបានការដឹកនាំ និងលើកទឹកចិត្តផ្ទាល់ពី ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ព្រមទាំង ឯកឧត្ដមបណ្ឌិតទេសរដ្ឋមន្ត្រី ថោង ខុន ប្រធានគណៈកម្មាធិការជាតិអូឡាំពិកកម្ពុជា ដែលបានអញ្ជើញទៅអមដំណើរ និងផ្តល់កម្លាំងចិត្តដល់អត្តពលិកកម្ពុជាដល់ទីលានប្រកួត។
អ្វីដែលជាមោទនភាពដ៏ខ្ពង់ខ្ពស់ និងជាដំណឹងរីករាយបំផុតសម្រាប់ប្រជាជាតិខ្មែរទាំងមូល គឺក្រុមកីឡាបាល់ទាត់លើតុកម្ពុជា បានប្រជែងដណ្តើមបានមេដាយដំបូងជូនមាតុភូមិ។ ក្នុងនាមជាប្រធានសហព័ន្ធកីឡាបាល់ទាត់លើតុកម្ពុជាផងនោះ ឯកឧត្ដម វ៉ាត់ ចំរើន បានសម្តែងនូវការកោតសរសើរ និងស្ញប់ស្ញែងយ៉ាងជ្រាលជ្រៅចំពោះកីឡាករ-កីឡាការិនីទាំងអស់ ដែលបានខិតខំប្រឹងប្រែងហ្វឹកហាត់យ៉ាងស្វិតស្វាញ រហូតអាចវិវត្តសមត្ថភាពពីការប្រកួតកម្រិតតំបន់ ស្ទុះទៅដណ្តើមបានមេដាយក្នុងព្រឹត្តិការណ៍កម្រិតទ្វីបដ៏ធំមួយនេះ។
ឯកឧត្ដមអគ្គលេខាធិការ NOCC បានសង្កត់ធ្ងន់ថា ៖
«ការសម្រេចបានមេដាយកម្រិតទ្វីបអាស៊ីនាពេលនេះ មិនត្រឹមតែជាជ័យជម្នះដ៏អស្ចារ្យប៉ុណ្ណោះទេ ប៉ុន្តែថែមទាំងជាគំរូ និងជាប្រភពថាមពលផ្លូវចិត្តដ៏សំខាន់ សម្រាប់ប្រភេទកីឡាផ្សេងៗទៀតរបស់កម្ពុជា ក្នុងការតស៊ូដណ្តើមជ័យជម្នះជូនជាតិ»។
សូមបញ្ជាក់ផងដែរថា ក្នុងការប្រកួតកីឡាបាល់ទាត់លើតុ (Table Football) នេះ កម្ពុជាដណ្តើមបាន មេដាយសំរឹទ្ធចំនួន ២គ្រឿង រួមមាន៖
វិញ្ញាសាគូនារី ៖ ឈ្នះដោយកីឡាការិនី យ៉ន សោភ័ណ្ឌរស្មី និងកីឡាការិនី ម៉ី ស្រីមាស
វិញ្ញាសាឯកត្តជននារី៖ ឈ្នះដោយកីឡាការិនី ឌី គឹមយាន
